დემოკრატიის კვლევის ინსტიტუტის განცხადებით, მმართველი პოლიტიკური ძალა და საქართველოს საპატრიარქო, რომელიც მაღალი რანგის სასულიერო პირებითაა წარმოდგენილი, მჭიდროდ თანამშრომლობენ. აღნიშნულზე ორგანიზაციის მიერ გამოქვეყნებულ შუალედურ ანგარიშში ვკითხულობთ.

"2021 წლის 11 აგვისტოდან 14 სექტემბრის ჩათვლით, მაღალი იერარქიის სასულიერო პირები სახელისუფლებო პარტიის მიერ საკრებულოს და თვითმმართველი ქალაქის/თვითმმართველი მერის კანდიდატთა წარდგენის ყველა ღონისძიებას დაესწრნენ", — აცხადებენ ისინი.

ანგარიშში აღნიშნულია, რომ მაღალი იერარქიის წარმომადგენელი ღვთისმსახურები ცდილობენ ოპოზიციის დისკრედიტაციას და ღიად და დაუფარავად უცხადებენ მხარდაჭერას სახელისუფლებო ძალას და კანდიდატს.

"მმართველი პარტიის მსგავსად, რელიგიური თემებით მანიპულირებას ცდილობენ პოლიტიკური სუბიექტების ლიდერები "ერთიანი ნაციონალური მოძრაობიდან", "საქართველოს პატრიოტთა ალიანსიდან", "ლელოდან" და პარტიიდან "გახარია საქართველოსთვის". თუმცა, გამონაკლისი შემთხვევების გარდა, სასულიერო პირები ღიად არ ესწრებიან მათ საარჩევნო ღონისძიებებს, — აცხადებენ ორგანიზაციაში.

ამას გარდა, ანგარიშში ვკითხულობთ, რომ გავრცელებულ ფაილებთან დაკავშირებით საპატრიარქოს ქართული ოცნების ხელისუფლება ღიად არ გაუკრიტიკებია, ამის ნაცვლად, თავდასხმის ობიექტები არა უშუალოდ თვალთვალის განმახორციელებლები, არამედ ფაილების გამავრცელებლები გახდნენ, მათ შორის კრიტიკული მედია საშუალებები და მათი მესაკუთრეები.