ექსპრეზიდენტი გიორგი მარგველაშვილი აცხადებს, რომ მის ყოფილ გუნდს, ქართულ ოცნებას მესამე პრეზიდენტის, მიხეილ სააკაშვილის გასამართლების მორალური და პოლიტიკური საფუძველი არ აქვს. მისი თქმით, მმართველი გუნდის დამოკიდებულება სააკაშვილის მიმართ აბსურდული გახდა.

გარდა ამისა, მარგველაშვილმა აღნიშნა, რომ სააკაშვილი დღეს პოლიტიკური ნიშნითაა დაპატიმრებული, მაგრამ ეს არ ნიშნავს, რომ რაიმე დანაშაული არ ჩაუდენია.

"მე მიმაჩნია, რომ დღეს სააკაშვილს ვერ გაასამართლებს ქართული ოცნება. მაშინ მე მიმაჩნდა, რომ ჩვენ სააკაშვილი გავასამართლეთ პოლიტიკურად, იმიტომ, რომ ჩამოვაშორეთ ხელისუფლებას.

პირველ რიგში იმიტომ [ვერ გაასამართლებს], რომ სააკაშვილთან მიმართებაში კითხვა, არის თუ არა ის ნომერ პირველი პოლიტიკური მტერი, 9 წლის თავზე აღარ არსებობს. აბსურდი გახდა ის დამოკიდებულება, რაც აქვს ქართულ ოცნებას სააკაშვილის მიმართ, აღარაფერზე აღარ ლაპარაკობს სააკაშვილის გარდა. არარეალური ფიგურა გახადა სააკაშვილი, ანუ მშენებლობა — არა, განვითარება — არა, პორტი — არა, რკინიგზა — არა, არაფერი, ერთადერთი მიზანი, ნათელი მიზანია სააკაშვილთან ბრძოლა. ასეთი დაპირისპირება პოლიტიკოსთან, თავისთავად გამორიცხავს, რომ შენ შეიძლება იყო ობიექტური შენს განსჯაში", — განაცხადა მან ფორმულას ეთერში.

მარგველაშვილი ამბობს იმასაც, რომ სააკაშვილს აქვს საპასუხო ქართველი ხალხისთვის, მაგრამ არა ქართული ოცნების წინაშე.

"კომიკურია, ის პოლიტიკური ძალა, რომელმაც შენი ყველა ნეგატივი აიღო, განამტკიცა და აიღო თავის მთავარ სამოქმედო სისტემად, გააძლიერა ყველაფერი ხო — მოსმენები გააძლიერა, შანტაჟის სამსახური გააძლიერა, პოლიტიკური დევნა — ამ თავის, ასე ვთქვათ, მასწავლებელს, და საფუძვლის ჩამდგმელს რა უფლებით და რა მორალური არგუმენტით გაასამართლებს", — განაცხადა მან.

მარგველაშვილის თქმით, ბრალდებები სააკაშვილის მიმართ, პიჯაკების საქმესა და გირგვლიანის საქმის ფიგურანტების შეწყალებაზე, აბსურდია.