პარტია ხალხისთვის ლიდერი, ანა დოლიძე აცხადებს, რომ პარტიის პოლიტსაბჭომ გადაწყვიტა, მეორე ტურისთვის პარტიული პოზიცია არ დააფიქსიროს.

"სწორედ ამიტომ, პარტია ხალხისთვის პოლიტ-საბჭომ გადაწყვიტა რომ პატივი სცეს დემოკრატიულობის პრინციპს და საკუთარ მხარდამჭერებს და მეორე ტურისთვის არ დააფიქსიროს პარტიული პოზიცია, რათა მისმა მხარდამჭერებმა თავად მიიღონ ის გადაწყვეტილება, რომელიც იქნება თითოეული მათგანისთვის, მათი ოჯახებისთვის და ქვეყნისთვის წარმატების მომტანი", — აცხადებს დოლიძე.

მისივე თქმით, მათ ერთპიროვნული და ვიწროპარტიული გადაწყვეტილება არ მიუღიათ და აირჩიეს სრულიად ახალი, დემოკრატიული გზა პარტიული პლებისციტის სახით.

"სხვადასხვა საინფორმაციო საშუალებებით თუ სოციალური ქსელებით მივმართეთ ჩვენ ამომრჩეველს, დავურეკეთ 200-ზე მეტ მხარდამჭერს, პარტიის ოფისში პირადად შეხვდით ათობით ადამიანს და მოვისმინეთ მათი პოზიცია. ჩვენი ამომრჩევლები არიან ძალიან მრავალფეროვანი, გონიერი და გაბედული ადამიანები, რომლებსაც აერთიანებთ ერთი მიზანი, ეს არის ცვლილება. თუმცა, ჩვენს ამომრჩევლებში ასევე დიდი ნაწილი არის ისეთი ადამიანი, რომელიც მეორე ტურში წარმოდგენილი კანდიდატებში სისტემური ცვლილებების და განახლების შესაძლებლობას ვერ ხედავს. ისინი წარმოდგენილ არჩევანში რეალურ ალტერნატივას ვერ ხედავენ", — ამბობს ანა დოლიძე.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ იყო მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებდა. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.