შინაგან საქმეთა სამინისტროს განცხადებით, ადმინისტრაციული სამართალდარღვევათა კოდექსის 166-ე და 173-ე მუხლების საფუძველზე თბილისი პრაიდის წარმომადგენელი გიორგი თაბაგარი და კიდევ ორი ადამიანი დააკავეს. აღნიშნული მუხლები წვრილმან ხულიგონობასა და სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას, ან ამ პირის მიმართ სხვა კანონსაწინააღმდეგო ქმედების განხორციელებას გულისხმობს.

რამდენიმე წუთის წინ გავრცელდა ინფორმაცია, რომ ბარ Success-თან თბილის პრაიდის წარმომადგენელი გიორგი თაბაგარი, თენგო ემინაშვილი და კიდევ ერთი ქალი დააკავეს. მას შემდეგ, რაც პოლიციამ გიორგი თაბაგარი მანქანისკენ წაიყვანა, ერთ-ერთმა ადგილზე მყოფმა პოლიციელს ჰკითხა: "ადამიანი რომ კითხულობს რატომ იჭერთ, მაგიტომ მიგყავთ?". პასუხად პოლიციელმა მას უთხრა: "დამშვიდდით, თორემ სხვებსაც მოგიწევთ დაკავება".

"Success ბარში ვიყავით, იყო ღია. პატრული მოვიდა, შევიდა შიგნით, რომ დაეშალათ თუ რაღაც. მერე რომ გამოვიდნენ, თენგო რატომ დაიჭირეს არ ვიცი, ალბათ რაღაცაზე შეეპასუხა. ათრიეს სახით და მერე გიორგი თაბაგარმა დაუძახა, რის გამო იჭერთ, *იგ ხო არ გაქვთო და ისიც ათრიეს, ჩასვეს მანქანაში და კიდევ ვიღაც გოგო ჩასვეს, რომელმაც ჩმორებო დაუძახა. ბარები ხომ 11-მდე უნდა იყოს, 12-ის ნახევრისკენ გამოიარეს და შევიდნენ", — ამბობს ერთ-ერთი თვითმხილველი On.ge-სთან.

თბილისი პრაიდის წარმომადგენლის, ანა სუბელიანის ინფორმაციით, სამი დაკავებული თაბუკაშვილის ქუჩაზე ძველი თბილისის პოლიციის სამმართველოში გადაიყვანეს.