იუსტიციის მინისტრი, რატი ბრეგაძე ადასტურებს, რომ უწყება გუშინვე ფლობდა ინფორმაციას რუსთავის ციხეში ხანძრის შედეგად გარდაცვლილთა შესახებ, თუმცა საზოგადოებისთვის ეს ინფორმაცია იმავე დღეს არ მიუწოდებიათ. მისი თქმით, ფაქტის დადასტურებისთანავე, ოჯახის წევრებს შეატყობინეს.

"დადგენილი წესის შესაბამისად, როგორც კი დადასტურდა აღნიშნული პირების გარდაცვალების ფაქტი შევატყობინეთ მათი ოჯახის წევრებს, ეს არის დადგენილი ფაქტი. გუშინვე [შევატყობინეთ], ძალიან მალე გარდაცვალების ფაქტის დადასტურების შემდეგ", — განაცხადა ბრეგაძემ რუსთავი 2-ის ეთერში.

ჟურნალისტის დამატებით კითხვას, თუ ინფორმაცია ჰქონდა ოჯახს, დღის მეორე ნახევარში საზოგადოებისთვის რატომ არ გახდა ცნობილი, რომ ორი პატიმარი დაიღუპა?, ბრეგაძე ასე პასუხობს:

"როგორც მოგეხსენებათ, ამ ეტაპზე მიმდინარეობდა გუშინ საღამოს, მთელი საღამოს განმავლობაში მიმდინარეობდა სალიკვიდაციო სამუშაოები. ასევე, ციხის ტერიტორიაზე არ იყო ელექტროენერგიის მიწოდება, შეგნებულად სახანძრო უსაფრთხოებიდან გამომდინარე. შემდეგ, ეტაპობრივად დაიწყო ელექტროენერგიის აღდგენა და ჩვენ თავიდან ბოლომდე დაკავებულები ვიყავით თითოეული პატიმრის უსაფრთხოებით. მეც პირადად ვიყავი ადგილზე, სადაც ვაკვირდებოდი ვითარებას ციხის ადმინისტრაციასთან ერთად და ჩვენ მთელი გუშინდელი საღამო მოცული ვიყავით იმით, რომ არცერთი პატიმარი არ ყოფილიყო დაშავებული, ციხეში ყოფილიყო სიმშვიდე და ამ შედეგს მივაღწიეთ", — თქვა მან.

14 ოქტომბერს რუსთავის N17 პენიტენციურ დაწესებულებაში გაჩენილი ხანძრის დროს ორი პატიმარი გარდაიცვალა. ინფორმაცია უწყებამ მხოლოდ მეორე დღეს, მას შემდეგ დაადასტურა, როცა ადვოკატებმა და მედიამ გაასაჯაროეს. 15 ოქტომბერს სახალხო დამცველმა, ნინო ლომჯარიამ განაცხადა, რომ არც პენიტენციურმა და არც ინსპექტორის აპარატმა მომხდარის შესახებ არ აცნობეს.

სახალო დამცველი ამბობს, რომ დაშავებულებზე ინფორმაცია არ აქვს, რაც შეეხება გარდაცვლილებს, მისი თქმით, ისინი სასწრაფო დახმარების ბრიგადამ საავადმყოფოში გადაიყვანა, მაგრამ არ იცის კლინიკაში მიყვანამდე გარდაიცვალენ, თუ მანამდე.

ასევე, უცნობია გარდაცვალება დაკვამლიანებამ გამოიწვია თუ დამწვრობამ — უწყება ამ ეტაპზე მეტ დეტალს არ ასაჯაროებს. მომხდართან დაკავშირებით, სახელმწიფო ინსპექტორის სამსახურმა უსაფრთხოების წესების შესაძლო დარღვევაზე გამოძიება დაიწყო.