ამერიკელ მილიონერ რობერტ დარსტს, რომელიც ამასთანავე HBO-ს დოკუმენტური სერიალის The Jinx-ის (ავი თვალი) მთავარი პერსონაჟია, საუკეთესო მეგობრის მკვლელობისთვის სამუდამო პატიმრობა მიუსაჯეს.

2000 წელს მოკლული სუზან ბერმანის საქმეში დამნაშავედ დარსტი ცნეს, რომელიც მსხვერპლის ახლო მეგობარი იყო. მკვლელობის მოტივად კი ის სახელდება, რომ მილიონერს არ სურდა, სუზანს პოლიციისთვის მისი გაუჩინარებული ცოლის შესახებ რამე ეთქვა.

BBC-ის მიხედვით, დეტექტივების მწერალი სუზან ბერმანი დარსტის მოწმე იყო იმ პერიოდში, როცა ის საკუთარი ცოლის გაუჩინარების საქმეში ეჭვმიტანილად ითვლებოდა. ბოლო სასამართლო პროცესზე ნაფიცმა მსაჯულებმა განაცხადეს, რომ დარსტი ცოლის მკვლელობაშიც დამნაშავეა, რომელიც 1982 წელს გაუჩინარდა და რომლის სხეული დღემდე არ უპოვიათ. სავარაუდოდ, სუზან ბერმანმა მთელი ამ დროის განმავლობაში ეს ისტორია იცოდა და მალავდა. პროკურორები ამტკიცებენ, რომ დარსტმა მესამე ადამიანიც მოკლა და ეს მისი მეზობელი მორის ბლექი იყო. ბლექმა დარსტი 2001 წელს ტეხასში მიმალვისას ამოიცნო, როცა თავს მუნჯ ქალად ასაღებდა.

აღსანიშნავია, რომ ამ ისტორიის შესახებ HBO-მ გახმაურებული დოკუმენტური სერიალი ავი თვალი გადაიღო, რომელმაც საქმის გახსნაში დიდი როლი ითამაშა. სერიალის სიუჟეტი თანმიმდევრულად მიჰყვებოდა მკვლელობების მოვლენებს, ხოლო დარსტი ბოლო ეპიზოდის გამოსვლის შემდეგ დააკავეს. "რა ჩავიდინე? რა და მე ისინი მოვკალი", — ამბობს დარსტი ბოლო სერიაში ისე, რომ არ იცოდა, მის ხმას რომ იწერდნენ. საინტერესოა ისიც, რომ სერიალის ეს ფრაზა ერთ-ერთმა ბრალმდებელმა სასამართლო პროცესზე არგუმენტადაც კი გამოიყენა.