ქართული ოცნების თავმჯდომარის, ირაკლი კობახიძის თქმით, "რასაც აკვირდება, ნაციონალური მოძრაობის დასასრულის დასაწყისია". ამის შესახებ მან ტელეკომპანია იმედის ეთერში ისაუბრა.

"ერთი, რასაც ვაკვირდებით ჩვენ ახლა, ეს არის ნაციონალური მოძრაობის დასასრულის დასაწყისი და ეს არის ძალიან კარგი პროცესი ჩვენი ხალხისთვის, ქართული დემოკრატიისთვის. ეს არის ის, რასაც საზოგადოება ელოდება უკვე წლების განმავლობაში. პრაქტიკულად, უკვე ორი ათწლეულია ნაციონალური მოძრაობა არ აძლევს მოსვენებას, სამწუხაროდ, ამ ქვეყანას. ეს კონკრეტულ შედეგებშია გამოხატული", — განაცხადა კობახიძემ.

კობახიძემ ისაუბრა თვითმმართველობის არჩევნების მეორე ტურზეც და განაცხადა, რომ ოპოზიციას "მოლოდინიც არ აქვს იმის", რომ სადმე მეორე ტურს მოიგებენ, თუმცა მისი მტკიცებით, ქართულ ოცნებას "სრული რესურსი" აქვს იმისთვის, რომ მეორე ტურებში გაიმარჯვოს.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.