ქართული ოცნების აღმასრულებელი მდივანი, მამუკა მდინარაძე განმარტავს, რატომ ვერ გაიმარჯვა თბილისის მერობის არჩევნების პირველივე ტურში კახა კალაძემ. იმ რამდენიმე მიზეზს შორის, რომელიც მან ჩამოთვალა იგივე თანამდებობაზე ექსპრემიერ გიორგი გახარიას მიერ საკუთარი კანდიდატურის დაყენებაცაა.

"ამ შემთხვევაში, იყო ბევრი ფაქტორი, ცალ-ცალკე ვერც ერთი ფაქტორი ვერ უზრუნველყოფდა იმას, რომ კალაძე მეორე ტურში გადასულიყო. ერთ-ერთი იყო, ესეც უნდა ვთქვათ გულწრფელად, გახარიას ფაქტორი: ჩვენი ხმების დიდი რაოდენობა, რაც წაიღო გახარიას პარტიამ და როგორც კანდიდატმა, გახარიამ, დიდი ნაწილი აქედან, აღმოჩნდა და ანალიზიც ასეთი კეთდება, რომ წაიღო კალაძის ხმები.

გარდა ამისა, მიშა სააკაშვილის მომენტი, წინა დღის, რომელმაც 3%-ით გაზარდა, მისი ამომრჩევლის აქტივობის ხარჯზე გაზარდა საერთო რაოდენობა ამომრჩევლების, საიდანაც [კალაძის] პროცენტი ნაკლები დაჯდა", — განაცხადა მდინარაძემ რუსთავი 2-ის ეთერში.

მისი ინფორმაციით, კალაძემ წინა თვითმმართველობის არჩევნებთან შედარებით 12 000-ით მეტი ხმა მიიღო, თუმცა პროცენტულად უფრო დაბალი მაჩვენებელი ჰქონდა. მდინარაძის ვერსიით, ამის მიზეზი ამომრჩეველთა მაღალი აქტივობა იყო, რასაც დეპუტატი გახარიას და სააკაშვილის ფაქტორების გარდა მერობის მსურველი ბევრი ოპოზიციური კანდიდატის არსებობით ხსნის.

თბილისის მერობის არჩევნების პირველ ტურში ქართული ოცნების კანდიდატმა, კახა კალაძემ ხმების 45,04% მიიღო, ნაციონალური მოძრაობის კანდიდატმა, ნიკა მელიამ კი — 33,96%. რაც შეეხება გიორგი გახარიას, ის მეორე ტურში ვერ გადავიდა, თუმცა პირველ ტურში ხმების 9,41% აიღო.

გაიგე მეტი: