ევროპარლამენტის დელეგაციის ხელმძღვანელის, მაიკლ გალერის განცხადებით, პრემიერმინისტრი არ უნდა საუბრობდეს ვინმესთვის ბრალდებების დამატებაზე, რადგან ეს მისი უფლებამოსილება არ არის. მისი თქმით, თუ ღარიბაშვილს სურს, საქართველოს სასამართლო დამოუკიდებლად განიხილონ, ასეთ განცხადებებს არ უნდა აკეთებდეს.

"პრემიერმინისტრმა ეს საკითხი უნდა მიანდოს სასამართლოს. პრემიერმინისტრის გადასაწყვეტი არ არის დამატებითი ბრალდებები უნდა იქნას წაყენებული თუ არა, არამედ სასამართლოსი. თუ სურს, რომ ჩვენ განვიხილოთ საქართველოს სასამართლო როგორც დამოუკიდებელი და კანონის უზენაესობაზე დაფუძნებული, მაშინ ასეთ განცხადებებს არ გავაკეთებდი", — განახადა მან ამერიკის ხმასთან.

გალერმა აღნიშნა, რომ საქართველოში დაბრუნებამდე სააკაშვილს ურჩევდნენ, ეს გადაწყვეტილება არ მიეღო. მისი თქმით, ჰქონდათ მოლოდინი, რომ პარტიებს შორის დაძაბულობას გაზრდიდა, თუმცა ასე არ მოხდა და განცხადებების მიღმა ამ საკითხს საარჩევნო პროცესისთვის ხელი არ შეუშლია.

გალერმა, სავარაუდოდ, სუს-ის ფაილების შესახებაც ისაუბრა და აღნიშნა, რომ მთავრობა იმაზე კი არ უნდა ფოკუსირდებოდეს, ვინ გაავრცელა ინფორმაცია, არამედ შეისწავლოს ვინ გასცა ბრძანება.

"ეს აჩვენებს, რომ არიან სტრუქტურები, რომლებიც კონტროლს არ ექვემდებარებიან. ფუნქციონირებად დემოკრატიულ ქვეყანაში ვიხილავდით, რომ შესაბამისი მინისტრი აიღებდა პასუხისმგებლობას და გადადგებოდა, თუმცა, ალბათ, ის თავად იყო ის, ვინც მოსმენების ბრძანება გასცა. არ ვაპირებ სპეკულაციას. საჭიროა ფოკუსირება იმაზე, თუ ვინაა ამ აღმაშფოთებელი მოსმენების უკან. თუ შემთხვევით, ეს არაა რომელიმე აქტიური პოლიტიკოსი, არამედ ბატონი ივანიშვილია, ეს ასევე აღმაშფოთებელია. შემიძლია ჩამოვთვალო ისინი, ვისზეც ეჭვია, თუმცა მე არ ვიცი ვინ გააკეთა ეს. ეს უნდა იყოს გამოძიებული და ამ ადამიანმა პასუხი უნდა აგოს", — განაცხადა გელერმა.

3 ოქტომბერს პრემიერმინისტრი ციხეში მყოფ ექსპრეზიდენტს დაემუქრა და თქვა, რომ "წესიერად მოიქცეს, თორემ დავუმატებთ კიდევ სხვა მუხლებს და სხვებსაც მივაყოლებთ". 11 ოქტომბერს კი კითხვის პასუხად თქვა, რომ მისი ნათქვამი არასწორად გაიგეს და უბრალოდ თეორიულად განმარტა ის პროცესი, რაც მსჯავრდებულის მხრიდან ახალი დანაშაულის ჩადენას მოყვებოდა. მისი თქმით, კითხვას "ნახევრად ირონიულად, პოლიტიკურად" უპასუხა.