დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, კორონავირუსით რეინფიცირების 10 ათასამდე შემთხვევაა დაფიქსირებული. ამაზე მან საკოორდინაციო საბჭოს სხდომაზე ისაუბრა და განაცხადა, რომ მესამეული ინფიცირების შემთხვევები არ ფიქსირდება.

"რეინფიცირების, დაახლოებით, ბოლო გადატარებით ბაზებზე გვაქვს, 9-დან 10 ათასამდე", — თქვა მან.

საქართველოში კორონავირუსის შემთხვევებმა იმატა. დღეს ქვეყანაში 4 774 ახალი შემთხვევა დაფიქსირდა, ხოლო ბოლო 24 საათში 37 ადამიანი გარდაიცვალა. დღეის მდგომარეობით ვაქცინირებულთა რიცხვმა ერთ მილიონს გადააჭარბა. კერძოდ, 11 ოქტომბრის მონაცემებით, სულ ჩატარებულია 1 874 845 აცრა. გამყრელიძის თქმით, ამას "არაუშავს, ცუდი არ არის, მაგრამ არც კარგია", რადგან ეს ჯერ მხოლოდ მათი სამიზნის 50%-ია. მისი განცხადებით, თუ ასე გაგრძელდა, სამიზნის მიღწევა კითხვის ნიშნის ქვეშ დადგება.

აღსანიშნავია, რომ საქართველოში კორონავირუსის ვაქცინის ე.წ. ბუსტერ დოზის ჩატარება 50 წელს ზემოთ ასაკისა და ქრონიკული დაავადებების მქონე მოქალაქეებში დაუშვეს. ჯანდაცვის მინისტრის მოადგილის, თამარ გაბუნიას თქმით, ოქტომბრის ბოლოდან ე.წ. ბუსტერის გაკეთება შესაძლებელი იქნება, როგორც Pfizer-ის, ასევე, ჩინური ვაქცინებით, თუმცა AstraZeneca-თი — არა.