On.ge-ის ჟურნალისტებმა, ლანა კოკაიამ და თამუნა გეგიძემ მიგრანტების ისტორიის გაშუქების კონკურსში გაიმარჯვეს. საკონკურსო თემატიკა საქართველოში მცხოვრებ მიგრანტთა ისტორიები, მიგრანტთა უფლებრივი მდგომარეობა და ინტეგრაციის საკითხები იყო.

კონკურსი ჩატარდა TDI-ის პროექტის მედიის ცნობიერების ამაღლება მიგრაციის საკითხებზე და მიგრაციის საერთაშორისო ორგანიზაციის (IOM) პროექტ EMERGE-ის ფარგლებში, ნორვეგიის საგარეო საქმეთა სამინისტროს მხარდაჭერით.

ორგანიზატორებმა ორი გამარჯვებული სტატია გამოავლინეს, რომელთა ავტორებიც დღეს დააჯილდოვეს. მათ შორის, ერთ-ერთი სამხრეთის კარიბჭის ჟურნალისტი, ნუკა სტეფნაძეა. მისი ნამუშევარი სამცხე-ჯავახეთში რეპატრირებული მესხების პრობლემებს ეხებოდა. სტატიის სრულად ნახვა შეგიძლიათ აქ.

On.ge-ის ჟურნალისტებმა კი მოამზადეს სტატია ერაყიდან საქართველოში საცხოვრებლად ჩამოსულ ოჯახზე და ჩვენს მკითხველს ალი, ნაჯლაა, აბდულაჰი და ელიასი გააცნეს.

თამერების ოჯახის გზა ერაყიდან საქართველომდე

ფოტო: თამუნა გეგიძე / ნატალია ავალიანი / On.ge

თამერები მხიარულები და ენერგიულები აღმოჩნდნენ. აბდულაჰი 7 წლისაა. ინტერვიუს პროცესი დიდად არ მოეწონა და სხვა გასართობი იპოვა. 6 თვის ელიასი კი ჯერ კომფორტულად მოკალათდა პუფში, შემდეგ დედასთან გადაინაცვლა, ბოლოს დაღლილმა და შეწუხებულმა მამის ყურადღება მოითხოვა. სანამ ერთი მშობელი ალიასს ართობდა, მეორე გვიყვებოდა, რატომ დატოვეს ერაყი და როგორ ცხოვრობენ საქართველოში.

წარმოშობით ერაყიდან არიან, თუმცა იქ მათი ოჯახის წევრები აღარ ცხოვრობენ. საფრთხისა და გაუსაძლისი პირობების გამო ქვეყანა დატოვეს. ჯერ დუბაიში სცადეს დამკვიდრება, მოგვიანებით კი საქართველო აღმოაჩინეს.

ალი და ნაჯლაა გვეუბნებიან, რომ აქ ჩამოსვლის მთავარი მიზეზი ცხოვრების სიმარტივეა. რაც შეეხება საქართველოსა და ერაყს შორის არსებულ განსხვავებებს, როგორც გვიყვებიან, ამას დიდი გავლენა არ მოუხდენია, რადგან ცხოვრების სტილის მსგავსი აღმოჩნდა.