კლინიკა მედცენტრის ექიმის განცხადებით, ნანგრევებიდან ამოყვანილი პაციენტის, ზვიად თავდგირიძის ჯანმრთელობის მდგომარეობა სტაბილურია და ყველა სასიცოცხლო მაჩვენებელი ნორმაშია მოსული.

"პაციენტის მდგომარეობა დღეისთვის არის სტაბილური, გვაქვს დადებითი დინამიკა, მეტად აქტიურია, ადეკვატურია, მისი სასიცოცხლო მაჩვენებლები ყველა ნორმაშია მოსული, ლაბორატორიულ-კლინიკური და ინსტრუმენტალური კვლევებითაც გვაქვს დადებითი დინამიკა. პაციენტთან ძირითადად მუშაობენ ახლა ქირურგები და ნევროლოგები და ვგეგმავთ, თუ ასეთი სტაბილური მდგომარეობა შენარჩუნდა, ხვალ უკვე გადავიყვანოთ განყფოლებაში", — განაცხადა ექიმმა.

11 ოქტომბერს ბათუმში კორპუსის ჩამონგრევის საქმეზე ბრალდებულ 3 ადამიანს აღკვეთის ღონისძიების სახით პატიმრობა შეუფარდეს. პროკურატურა აცხადებს, რომ ბრალდებულებმა მოშალეს მზიდი და არამზიდი კედლები, რითაც დაირღვა საცხოვრებელი კორპუსის სიმტკიცე და მდგრადობა და ნგრევა გამოიწვია.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. სამაშველო ღონისძიება თითქმის 30 საათის განმავლობაში მიმდინარეობდა. დაღუპულია 9 ადამიანი, გადარჩა ერთი. გარდაცვლილებს შორის 3 არასრულწლოვანია.

9 ოქტომბერს კორპუსის ჩამონგრევის საქმეზე სამი ადამიანი დააკავეს. ერთ-ერთი ზაურ ბუდადოვია, რომელიც პირველ სართულზე მდებარე ბინის მესაკუთრეა. დანარჩენი ორი კი მის მიერ დაქირავებული მშენებლები. პროკურატურა აცხადებს, რომ ბრალდებულებმა მოშალეს მზიდი და არამზიდი კედლები, რითაც დაირღვა საცხოვრებელი კორპუსის სიმტკიცე და მდგრადობა და ნგრევა გამოიწვია. ბათუმში მომხდარი ტრაგედიის გამო, 11 ოქტომბერი გლოვის დღედ გამოცხადდა.