თაკო ჩარკვიანის შექმნილი სახალხო მოძრაობის ორგანიზებით, პარლამენტთან ყოფილი პრეზიდენტის, მიხეილ სააკაშვილის გათავისუფლების მოთხოვნით აქცია მიმდინარეობს. ჩარკვიანის თქმით, სააკაშვილი დაუყოვნებლივ უნდა გათავისუფლდეს ციხიდან.

"რუსეთის მიერ დევნილი პრეზიდენტი, არამც და არამც არ უნდა გაასამართლოს რუსეთზე მომუშავე ხელისუფლებამ. ეს გადაბმულია, მოდით გავაკეთოთ რეფორმები, რომლითაც მიწისაგან პირისა უნდა აღვგაოთ კორუფცია. შესაბამისად, ნორმალურმა მართლმსაჯულებამ განიხილოს ყველას საქმე ამ ქვეყნად. არა შერჩევით სამართალს, არა კორუფციას, რომელმაც პრაქტიკულად ჩამოშალა და ჩამოანგრია ჩვენი სახელმწიფო", — ამბობს თაკო ჩარკვიანი.

თაკო ჩარკვიანმა ექსპრეზიდენტ მიხეილ სააკაშვილის დასაბრუნებლად ორგანიზაცია საერთო სახალხო მოძრაობა 10 სექტემბერს დააფუძნა. მისი თქმით, სააკაშვილის მიმართ პოლიტიკური დევნა უნდა შეწყდეს, ის უნდა დაბრუნდეს საქართველოში და დაუბრუნდეს მოქალაქეობა, რომელიც "არასწორად ჩამოერთვა".

მიხეილ სააკაშვილის მხარდასაჭერი აქცია ერთიანმა ნაციონალურმა მოძრაობამ 14 ოქტომბერს დააანონსა. ამ აქციას თაკო ჩარკვიანი და მისი პარტიაც შეუერთდება.

არჩევნების წინა დღეს, პირველ ოქტომბერს მიხეილ სააკაშვილმა დაპოსტა, რომ საქართველოში იმყოფებოდა. რამდენიმე საათში მან კიდევ ორი ვიდეო გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას. ქართულ ოცნებაში ამტკიცებდნენ, რომ ის არათუ ქვეყანაში არ შემოსულა და კვლავ უკრაინაში იყო. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს. სააკაშვილს შიმშილობა აქვს გამოცხადებული.

ყოფილი პრეზიდენტი მე-10 დღეა რუსთავის ციხეში იმყოფება. ის არ ეთანხმება წარდგენილ ბრალს და პირველივე დღიდან შიმშილობს.