სოციალური სამართლიანობის ცენტრი აცხადებს, რომ ბათუმში მომხდარი ტრაგედია სამშენებლო პოლიტიკის რადიკალური ცვლილების წინაპირობა უნდა გახდეს. არასამთავრობო ორგანიზაცია ბათუმში ხუთსართულიანი საცხოვრებელი შენობის სადარბაზოს ჩამონგრევის ფაქტის სათანადო გამოძიებასა და შესწავლას მოითხოვს.

"არსებითად მნიშვნელოვანია ეს ტრაგიკული ფაქტი სამშენებლო რეგულაციებისა და ზედამხედველობის, ასევე, საბინაო პოლიტიკის ფართე კონტექსტში იყოს დანახული და ჯეროვანი პოლიტიკური განხილვებისა და გრძელვადიანი ინსტიტუციური ცვლილებების საფუძველი გახდეს", — ნათქვამია განცხადებაში.

სოციალური სამართლიანობის ცენტრი მიიჩნევს, რომ პირველ ეტაპზე მნიშვნელოვანია დაზარალებული ოჯახების სამართლებრივი და სოციალური მხარდაჭერა და დარღვეული უფლების, მიყენებული მატერიალური და მორალური ზიანის აღდგენისთვის საჭირო სამართლიანი და ღირსეული გზების ძიება. მათივე თქმით, მით უფრო, რომ ამ საქმეში კრიტიკულ შეფასებას მოითხოვს სახელმწიფოს მხრიდან სამშენებლო უსაფრთხოებისთვის საჭირო პოზიტიური ვალდებულებების შესრულების საკითხი.

"ბათუმში ხუთსართულიანი საცხოვრებელი შენობის ჩამონგრევა სავარაუდოა, რომ სუსტ სამშენებლო რეგულირებასა და ტექნიკურ ზედამხედველობას უკავშირდება. სისტემური პრობლემაა სამშენებლო სანებართვო პირობების შეთანხმებაზე პასუხისმგებელი უწყებების მხრიდან საკუთარი უფლებამოსილებების არაჯეროვნად შესრულება", — აცხადებს ორგანიზაცია.

სოციალური სამართლიანობის ცენტრში აღნიშნავენ, რომ მათი დაკვირვებითა და გამოცდილებით, არაერთ შემთხვევაში, იკვეთება სამშენებლო ნებართვის გაცემაზე პასუხისმგებელი ორგანოების მხრიდან ლოიალური დამოკიდებულება დეველოპერებისადმი და არათანმიმდევრული მიდგომა სამშენებლო პირობების მოთხოვნებთან და მათ შესრულებასთან დაკავშირებით. მათივე თქმით, მასობრივი სახე აქვს მანკიერ პრაქტიკას, რომლის მიხედვითაც, სამშენებლო ნებართვები არასათანადო საპროექტო დოკუმენტაციისა და საექსპერტო დასკვნების საფუძველზე გაიცემა. მათ შორის ყველაზე მწვავეა გეოლოგიური დასკვნების ხარისხის არასათანადოობა და სიზუტეც

"გვსურს, ასევე, ხაზი გავუსვათ, რომ ტექნიკური და სამშენებლო ზედამხედველობის ორგანოები სუსტი და არაქმედითია როგორც მუნიციპალურ, ისე ეროვნულ დონეებზე. რიგ შემთხვევებში მონიტორინგის სამსახურები კანონის მოთხოვნებს უგულებელყოფენ, იყენებენ შემოწმების არასათანადო სტანდარტს და იშვიათად რეაგირებენ დარღვევებზე", — ვკითხულობთ განცხადებაში.

ორგანიზაცია ცალკე აღნიშნავს იმასაც, რომ მოქმედი კანონმდებლობა სამშენებლო მასალების და მშენებლობის ხარისხისა და მდგრადობის კონტროლის მექანიზმებს არ იცნობს, რაც შესაძლოა მომავალში არაერთი უბედური შემთხვევის მიზეზი გახდეს.

"დღეს სახელმწიფოში სამშენებლო მარეგულირებელი ფუნქციების დასუსტება და გაქრობა ბათუმის მსგავსი საყოველთაო ტრაგედიებისგან დაზღვევის მცირე შესაძლებლობებს ტოვებს. დერეგულაცისთან ერთად აღმოცენებული კორუფცია და სახელმწიფო უწყებების სისუსტე რომ არცერთ ეკონომიკურ კლასსა, თუ არანაირი სიმსხვილის პროექტს არ იცავს, დაადასტურა ბათუმში 2018 წელს მომხდარმა ტრაგედიამაც. საზოგადოებას ახსოვს მსხვილი დეველოპერული პროექტისათვის საშეღავათო პირობებით ნაგები სასტუმრო ლეო გრანდი, რომელშიც გაჩენილმა ხანძარმა 12 ადამიანის დაღუპვა გამოიწვა 2018 წელს", — ნათქვამია განცხადებაში.

სოციალური სამართლიანობის ცენტრი თანაუგრძნობს გარდაცვლილი ადამიანების ოჯახებს, მთლიანად ქალაქ ბათუმს და დაზარალებული ოჯახებისთვის სამართლებრივი მხარდაჭერის გასაწევად მზადყოფნას გამოთქვამს.

ცოტა ხნის წინ შინაგან საქმეთა მინისტრმა, ვახტანგ გომელაურმა განაცხადა, რომ ნანგრევებიდან ყველა ადამიანი ამოიყვანეს და შესაბამისად, სამძებრო სამუშაოები ჩერდება.

მინისტრის ინფორმაციით, მომხდარს 2 ადამიანი გადაურჩა, გარდაიცვალა 3 არასრულწლოვანი, ერთია 7 წლის, მეორე წლისა და 3 თვის და მესამე 12 წლის. დანარჩენი გარდაცვლილები კი სრულწლოვანები არიან.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, დაღუპულია 9 ადამიანი. ერთ-ერთი 9 ოქტომბერს საავადმყოფოში გარდაიცვალა. დაღუპულებს შორის 3 არასრულწლოვანია.

ბათუმში სამაშველო ღონისძიება თითქმის 30 საათის განმავლობაში მიმდინარეობდა.