შინაგან საქმეთა მინისტრი ვახტანგ გომელაური ამბობს, რომ ნანგრევებში კიდევ სამ ადამიანს ეძებენ. ის, ასევე, აღნიშნავს, რომ სამძებრო-სამაშველო ოპერაცია უწყვეტ რეჟიმში გრძელდება

"ჩვენი ინფორმაციით, თითქმის დაზუსტებით შეგვიძლია ვთქვათ, რომ ვეძებთ კიდევ 3 ადამიანს და მეტი არ უნდა იყოს წესით, რაც ჩვენ ოპერატიული ინფორმაცია გვაქვს. თითოეულ აგურზე სიფრთხილით მუშაობენ ხედავთ მაშველები, რომ თუ ადამიანი
ცოცხალია, ჩვენ არ დავაზიანოთ, ხელით მუშაობენ. ამ სამ ადამიანს რომ
ვიპოვით, შეიძლება უფრო გახშირდეს მუშაობის რიტმი. შევა ტექნიკა და ადვილი
იქნება გაწმენდითი სამუშაოები.", — თქვა გომელაურმა ჟურნალისტებთან.

მისივე თქმით, გამოძიება ჩამონგრეული კორპუსის საქმეზე ყველა მიმართულებით მიმდინარეობს, მათ შორის, გაცემული სამშენებლო ნებართვების.

ბათუმის რეფერალურ ჰოსპიტალში ნანგრევებიდან ამოყვანილი ქალი გარდაიცვალა. ინფორმაცია ამის შესახებ On.ge-ს კლინიკის პრესსამსახურში დაუდასტურეს.

მეორე დაშავებული კლინიკა მედცენტრში არის მოთავსებული. მთავარი ექიმი ჯემალ გელაშვილი ამბობს, რომ ნანგრევებიდან ამოყვანილი კაცის მდგომარეობა მძიმეა, მაგრამ კონტროლირებადი. ექიმის თქმით, პაციენტს წუხელ მთელი რიგი ლაბორატორიული ანალიზები და სპეციალისტების კონსულტაციები ჩაუტარდა. წინასწარი დიაგნოზირების შედეგად გამოვლინდა: სუნთქვის მწვავე უკმარისობა, ხანგრძლივი ზეწოლის სინდრომი, დაუზუსტებელი შოკი. ექიმის ინფორმაციით, პაცინეტს, ასევე, აღენიშნება მარცხენა წვივის მოტეხილობა, მარჯვენა ზედა კიდურის დაჟეჟილობა და მთელ სხეულზე მრავლობითი ექსკორიაციები.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველებმა ადგილიდან ორი ადამიანი ცოცხალი გამოიყვანეს, თუმცა ერთ-ერთი ბათუმის რეფერალურ ჰოსპიტალში 9 ოქტომბერს გარდაიცვალა.

დღის განმავლობაში ნანგრევების ქვეშ მოყოლილი მანქანიდან ამოიყვანეს წლის და 3 თვის ბავშვი. ის საავადმყოფოდან უკვე გაწერეს.

ნაპოვნია 5 ცხედარი — 2 ბავშვი, 1 ასაკოვანი ქალი და 2 კაცი. სამაშველო და სამძებრო ღონისძიებები თითქმის 24 საათია გრძელდება.