11 ოქტომბერს, ლონდონის დროით 04:00 საათიდან, დიდი ბრიტანეთი საქართველოს ე.წ. წითელი სიიდან ამოიღებს. ბრიტანეთის საყოველთაო ვაქცინაციის პროცესის ფარგლებში სრულად აცრილი პირები გამგზავრებამდე ტესტირებისა და თვითიზოლაციის ვალდებულებისგან თავისუფლდებიან და მათ ჩასვლიდან მხოლოდ მე-2 დღეს მოუწევთ PCR ტესტის ჩატარება.

ბრიტანეთში მიმავალი არავაქცინირებული საქართველოს მოქალაქეები ქვეყნის ტერიტორიაზე შესვლას შეძლებენ იმ შემთხვევაში, თუ საზღვარზე წარადგენენ 72 საათით ადრე ჩატარებული PCR ტესტის უარყოფით პასუხს. ამასთანავე, საჭიროა ტესტირების სამგზავრო პაკეტის შეძენა, რაც მოიცავს თვითიზოლაციის მე-2 და მე-8 დღეს გასაკეთებელი ტესტების დაჯავშნას. ბრიტანეთის ტერიტორიაზე შესვლის მსურველმა უნდა შეავსოს ბოლო 48 საათის განმავლობაში მგზავრის ადგილსამყოფელის ფორმა 10-დღიანი თვითიზოლაციის გავლის მისამართის მითითებით.

ჩასვლის შემდგომ არავაქცინირებული მოქალაქე გაივლის 10-დღიან თვითიზოლაციას წინასწარ მითითებულ ადგილას და თვითიზოლაციის მე-2 და მე-8 დღეს ჩაიტარებს PCR ტესტს.