ბათუმის საქალაქო სასამართლომ იმ პირების მიმართ შეწყვიტა ადმინისტრაციულ საქმის წარმოება, ვისი დაჯარიმების შემდეგაც 11 მარტს ბათუმში აქციები დაიწყო. ინფორმაციას სასამართლო პროცესის შესახებ ნეტგაზეთი ავრცელებს.

ნეტგაზეთის ინფორმაციით, მოსამართლე გოჩა ფუტკარაძემ მიიჩნია, რომ რამაზ ხიმშიაშვილს სამართალდარღვევა არ ჩაუდენია, ჯიმი ვარშანიძეს კი საზოგადოებრივი წესრიგის დარღვევის გამო ჯარიმა – 100 ლარი დააკისრა.

ბათუმში 11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.