პარტია საქართველოსთვის ლიდერის, გიორგი გახარიას განცხადებით, არცერთ მუნიციპალიტეტის დონეზე ქართულ ოცნებასთან და ნაციონალურ მოძრაობასთან კოალიციის შექმნას არ აპირებენ.

"მინდა აღვნიშნო, რომ ჩვენ არცერთ მუნიციპალიტეტის დონეზე არ ვაპირებთ კოალიციის შექმნას არც ოცნებისთვის და არც ნაციონალური მოძრაობისთვის", — თქვა მან.

გახარიამ ქართულ ოცნებასა და ნაციონალურ მოძრაობას ღია ფორმატში სამმხრივი მოლაპარაკება შესთავაზა, რომლის მიზანიც დაბალანსებული საკრებულოების საკადრო შემადგენლობის მიღება იქნება.

"ჩვენ ვთავაზობთ ოცნებას და ნაციონალურ მოძრაობას, ღია ფორმატში, ღია სამმხრივ მოლაპარაკებებს, რომლის მიზანიც იქნება დაბალანსებული საკრებულოების, საკრებულოების საკადრო შემადგენლობის მიღება. ჩვენ მზად ვართ უპირობოდ, კიდევ ერთხელ ხაზგასმით აღვნიშნავ, უპირობოდ დავეთანხმოთ ამ ფორმატში შერჩეულ ნებისმიერ კანდიდატს და მხარი დავუჭიროთ ასეთ კანდიდატებს ნებისმიერ საკრებულოში, ეს არის ჩვენი მთავარი მიზანი", — განაცხადა პარტიის ლიდერმა.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა, ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.