ექსპრეზიდენტ მიხეილ სააკაშვილზე პრემიერმინისტრის, ირაკლი ღარიბაშვილის პოსტს ფოთის მერობის კანიდატი, გიგი უგულავა კოტე ყუბანეიშვილის ლექსით პასუხობს. უგულავა წერს, რომ ღარიბაშვილმა კომენტარი წაუშალა, ამიტომ სქრინს ფეისბუქგვერდზე აქვეყნებს. ამ დროისთვის მისი კომენტარი პრემიერის პოსტის ქვეშ არ იძებნება.

უგულავა აღნიშნავს, რომ ღარიბაშვილი "უვიცი რომ არ იყოს" ეცოდინებოდა პატიმრის მდგომარეობა შიმშილობისას. მისივე თქმით, როცა პრემიერი პატიმარზე და მის ჯანმრთელობაზე ღლიცინებს, პასუხად ყუბანეიშვილის ლექსს იმსახურებს.

"რადგან კომენტარი წაშალეთ აქედან გპასუხობთ თქვენს დილის პოსტზე. შიში გალაპარაკებთ, სირცხვილი ისედაც არასდროს გქონიათ. ბრიყვი და უვიცო რომ არ იყოთ გეცოდინებოდათ — როცა პატიმარი შიმშილობს ის ფიზიკურად ძაბუნდება, მაგრამ როგორც არასდროს სულიერადაა მტკიცედ. ხოლო როცა პრემიერი პატიმარზე და მის ჯანმრთელობაზე ღლიცინებს, მასზე პასუხი კი დაგიწერეთ და აქაც გაახლებთ კოტე ყუბანეიშვილის ლექსს. ლექსის ბოლო შეგიძლიათ მოიძიოთ", — წერს ის.

რაც შეეხება ყუბანეიშვილის ლექსს, მისი დასასრული შეურაცხმყოფელია და ნაწილი, რომელიც უგულავას დადებულ სქრინზე არ ჩანს, ასე გრძელდება:

რამდენი ითამაშა
რამდენი დახარჯა
რამდენი მოატყუა
რამდენი იცინა
რამდენი იავადმყოფა
რამდენი იწვალა
რამდენი ილოცა
რამდენი მოინანია
რამდენი სანთელი დაანთო
და მაინც რა *ლეა

კოტე ყუბანეიშვილი

პრემიერმინისტრი ექსპრეზიდენტზე ვრცელ ფეისბუქპოსტს აქვეყნებს, რომელშიც ავითარებს სხვადასხვა აზრს, განიხილავს ჭორს და თეორიას იმაზე, თუ რატომ ჩამოვიდა ის ქვეყანაში. ვერსიებს შორის პრემიერს ნარკოტიკებზე დამოკიდებულება და სახელმწიფო გადატრიალებაც აქვს ისე, რომ ბრალდებების გასამყარებლად არა ფაქტები, არამედ მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ამ თემაზე ირონიულად საუბარი აძლიერებს სტიგმას და დისკრიმინაციულია.