თბილისის მერობის კანდიდატი და ქართული ოცნების გენერალური მდივანი, კახა კალაძე ამბობს, რომ ექსპრეზიდენტი მიხეილ სააკაშვილი ახლა საუკეთესო ადგილას არის, რუსთავში. ის სააკაშვილის დაკავების სპეცოპერაციას "იდეალურად შესრულებულს" უწოდებს და მადლობას უხდის სამართალდამცავებს, რომ "მშვიდობიანად, წყნარად, ყოველგვარი პრობლემის გარეშე და ყველა ადამიანს მიუჩინეს საკუთარი ადგილი".

"მიხეილ სააკაშვილი არის საუკეთესო ადგილზე რუსთავში, სადაც მოუწევს პასუხისგება იმ კონკრეტულ ჩადენილ დანაშაულებზე, რომელიც მან ქვეყნის და ხალხის წინაშე ჩაიდინა. ასე რომ, დაელოდეთ ამ პროცესებს, საკმაოდ საინტერესო მოვლენები არის", — განაცხადა კახა კალაძემ ბრიფინგზე.

კალაძემ ასევე ისაუბრა ადგილობრივი თვითმმართველობის არჩევნების პოლიტიკურ მნიშვნელობაზეც:

"შეგახსენებთ, რომ ამ არჩევნებს აქვს სერიოზული პოლიტიკური დატვირთვა. გვესმის, რომ გუშინდელი მოვლენების შემდეგ ნაციონალური მოძრაობა და მისი სატელიტები ჩამოშლილი არიან, თუმცა ამან არ უნდა მოგვცეს მოდუნების საშუალება. დღეს ჩვენი მაქსიმალური აქტიურობით შეგვიძლია საბოლოოდ დავასრულოთ პოლარიზაცია, სიძულვილი და აგრესია ქართულ პოლიტიკასა და საზოგადოებაში".

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.