ცენტრალური საარჩევნო კომისიის მტკიცებით, საარჩევნო ადმინისტრაციის თანამშრომლებზე ზეწოლა გრძელდება. უწყება სატელეფონო მიმოწერის ფოტოებს ავრცელებს და ზეწოლის ორ შემთხვევაზე საუბრობს.

"საარჩევნო ადმინისტრაციის თანამშრომლებზე ინტენსიური ზეწოლა გრძელდება. საბურთალოს საოლქო საარჩევნო კომისიის თავმჯდომარე, ბესიკ ლაჩაშვილმა მიიღო სატელეფონო შეტყობინება, სადაც მათ თანამდებობის დატოვებისკენ მოუწოდებენ და გადადგომის შემთხვევაში მხარდაჭერას პირდებიან. შევტყობინების ავტორია ნაციონალური მოძრაობის კანდიდატი, ზვიად კუპრავაა.

გარდა ამისა, ცესკოს რამდენიმე თანამშრომელმა ასევე მიიღო სატელეფონო შეტყობინება, სადაც თანამშრომლებს მოუწოდებენ უარი თქვან არჩევნების ორგანიზებაში მონაწილეობაზე და ამის შესახებ განცხადება გააკეთონ", — წერია განცხადებაში.

ამასთან, ცესკოში ამბობენ, რომ სოციალურ ქსელში ამომრჩეველთა ბარათების ცრუ ფოტოები და ინფორმაცია ვრცელდება, თითქოს ზოგიერთ მისამართზე გარდაცვლილი პირების სახელზე გაცემული ამომრჩეველების, ხოლო ზოგან ისეთი ადამიანების ბარათები მივიდა, რომლებიც აღნიშნულ ადგილას არ ცხოვრობენ.

ცენტრალურ საარჩევნო კომისიაში ირწმუნებიან, რომ აღნიშნული ინფორმაცია გადაამოწმეს და ის სიმართლეს არ შეესაბამება. ისინი არჩევნებში ჩართულ მხარეებს მოუწოდებენ, საარჩევნო ადმინისტრაციას მუშაობაში ხელი არ შეუშალონ.

მანამდე, ქართული ოცნების ერთ–ერთმა ლიდერმა, მამუკა მდინარაძემ გააკეთა განცხადება, რომ მათ ერთიანი ნაციონალური მოძრაობის წარმომადგენლების შიდა ჩათებიდან აქვთ ინფორმაცია. მდინარაძის მტკიცებით, მიმოწერაში საუბარია კომისიის წევრებზე განხორციელებულ ზეწოლაზე.

ადგილობრივი თვითმმართველობის არჩევნები, ხვალ, 2 ოქტომბერს გაიმართება.