რაიან მერფის სერიალში American Crime Story, რომლის მესამე სეზონიც ჯანი ვერსაჩეს მკვლელობას ეხება, დონატელას როლს ოსკაროსანი მსახიობი პენელოპე კრუზი შეასრულებს.

რაიან მერფის ჯერ-ჯერობით არ განუმარტავს თუ რატომ მოხდა ასეთი ცვლილება. ცოტა ხნის წინ ცნობილი გახდა, რომ ამავე სერიალში ჯანის როლს მსახიობი ედგარ რამირესი, ხოლო მისი მკვლელის ენდრიუ კუნინის როლს დარენ კრისი შეასრულებს.

1997 წლის 15 ივლისს ჯანი ვერსაჩე პრესის საყიდლად გავიდა, სახლში დაბრუნებისას კი მას თავს ენდრიუ კუნინი დაესხა და მოკლა, თავად ენდრიუმ კი იმავე იარაღით მოიკლა თავი.

მკვლელობის ნამდვილი მიზეზი დღემდე დაუდგენელია, თუმცა ვარაუდობენ რომ მკვლელობა კალაბრიის მაფიოზურმა ორგანიზაციამ შეუკვეთა, რომელმაც ძალიან ბევრი ფული იშოვა ვერსაჩეს ბრენდის ყალბი სამკაულების დამზადებით. მკვლელობამდე ცოტა ხნით ადრე ჯანიმ სერიოზული ომი გამოუცხადა ამ კრიმინალურ ორგანიზაციას.

ტრაგიკული ამბის შემდეგ სამოდელო სახლს სათავეში დონატელა ვერსაჩე ჩაუდგა და მოახერხა, რომ ბრენდის წარმატება შეენარჩუნებინა.

ამერიკული კრიმინალური ისტორია FX-ის ერთ-ერთი ყველაზე პოპულარული და წარმატებული სერიალია, რომლის ავტორიც ამერიკული საშინელებათა ისტორიის შემქმნელი რაიან მერფია. სერიალის პირველი სეზონი ამერიკელი სპორტსმენის, ო. ჯეი. სიმფსონის ცოლისა და ბოიფრენდის მკვლელობას ეხებოდა. მეორე სეზონის თემა კი ქარიშხალი კატრინა იქნება, რომელიც აშშ-ის ისტორიაში ერთ-ერთი ყველაზე დამანგრეველი სტიქია აღმოჩნდა. 2005 წლის ქარიშხლების სეზონზე კატრინა რიგით მეხუთე ქარიშხალი იყო, რომელსაც 1245 ადამიანი ემსხვერპლა, სტიქიისგან მიყენებული ზარალის საერთო ოდენობამ კი $108 მილიარდს გადააჭარბა.