საქართველოს პრეზიდენტი გიორგი მარგველაშვილი კამპანიის კონსტიტუცია ყველასია ფარგლებში თბილისში, ფაბრიკის ტერიტორიაზე, ახალგაზრდებს შეხვდა.

კითხვაზე, რამდენად ირღვევა ადამიანის უფლებები საქართველოში არსებული ნარკოპოლიტიკით, გიორგი მარგველაშვილმა უპასუხა, რომ ეს კონსტიტუციური საკითხია და ადამიანის ფუნდამენტურ უფლებას, თავისუფლებას, უკავშირდება.

"ჩემთვის მიუღებელია, როდესაც, ადამიანს, იმისთვის, რომ მოიხმარა რაღაც ნარკოტიკი, არ ჩაუდენია კრიმინალი, არც არავინ მოუკლავს, არც არავინ გაუძარცვავს, არც არავიზე უძალადია, მოიხმარა ნარკოტიკი, ამის გამო ვსვამთ ციხეში. გაუგებარია ეს ჩემთვის".

პრეზიდენტმა აღნიშნა, რომ მისთვის გაუგებარია, რატომ უნდა ჩასვას ადამიანი ციხეში, თუ მან თავის თავს რამე დაუზიანა:

"თავისუფლება ის კი არ არის, რომ ჩვენ სწორ არჩევანს გავაკეთებთ, თავისუფლება შეცდომების დაშვების უფლებაცაა. მე თუ გეტყვი, რომ თავისუფალი იყავი, მაგრამ ეს, ეს, ეს, ეს არის სწორი, სხვა რამე არ გააკეთო, თავისუფალი ხარ და აირჩიე რასაც მე გეტყვი, რაც მე მიმაჩნია სწორად ის. და ეს არ არის თავისუფლება. თავისუფლებას როდესაც ადამიანს აძლევ, მას აძლევ შეცდომების დაშვების უფლებას.

თუ ეს ადამიანი მოიხმარს ნარკოტიკს და ამით თავს აზიანებს, ეს მისი თავისუფლებაა და ჩემი აზრით, ჩვენ მას ამის გამო ციხეში არ უნდა ვსვამდეთ.

ჩემთვის ძალიან მძიმეა, რომ ვხედავ, რომ ადამიანებს სვამენ ციხეში, იმისთვის რომ ვიღაცამ კანაფი მოწია".

გიორგი მარგველაშვილმა ახალგაზრდებს საზოგადოებრივ ცხოვრებაში აქტიური ჩართვისა და კონსტიტუციის საკითხებისადმი დისკუსიის გახსნისაკენ მოუწოდა.