თალიბებმა ავღანეთის ქალაქ ჰერათში ადამიანთა გატაცებაში ეჭვმიტანილი 4 პირის ცხედარი საზოგადოებრივი თავშეყრის ადგილებში ჩამოკიდეს. საერთაშორისო მედიებთან საუბრებში, ადგილობრივები ამბობენ, რომ მიზანი სხვებისთვის "მაგალითის ჩვენება" და "ჭკუის სწავლებაა".

ფაქტის ამსახველი ფოტოები Ap News-მა გაავრცელა. კადრებში ჩანს, რომ ერთ-ერთი ცხედარი ამწე კრანზე კიდია და ირგვლივ ხალხია შეკრებილი.

თალიბანის ოფიციალური პირები აცხადებენ, რომ სავარაუდო დამნაშავეები, რომლებიც მამა-შვილის გატაცებაში მონაწილეობდნენ, პოლიციამ მოკლა. პოლიციის უფროსის თქმით, თალიბებმა გატაცებულები გადაარჩინეს, გამტაცებლებმა კი მათი მებრძოლი და სამოქალაქო პირი დაჭრეს.

"ამ ქმედების მიზანი იყო ის, რომ გავაფრთხილოთ ყველა დამნაშავე, რომ ისინი უსაფრთხოდ არ არიან", — ამბობს თალიბების ერთ-ერთი მეთაური AP-სთან.

CNN-თან ინტერვიუში ადგილობრივები ამბობენ, რომ 4 ცხედარი ჯერ ქალაქის ცენტრში მიიტანეს, შემდეგ კი ქალაქის მასშტაბით სხვადასხვა ლოკაციაზე გადაიტანეს.

მანამდე, 24 სექტემბერს ცნობილი გახდა, რომ თალიბანი, ავღანეთში სიკვდილით დასჯასა და ხელების მოკვეთის სასჯელის აღადგენას გეგმავს.