გირჩი — მეტი თავისუფლების ლიდერის, ზურაბ ჯაფარიძის თქმით, ჩატარებული კვლევები აჩვენებს ტენდენციას, რომ ქართული ოცნება ძალაუფლებას კარგავს. მისი თქმით, მმართველი პარტია მაინც დადგება იმ რეალობის წინაშე, რომ ხელახალი არჩევნები ჩაატაროს.

"კვლევები აჩვენებს ტენდენციას და ეგ არ ნიშნავს, არცერთი კვლევა არ ნიშნავს, რომ დღეს რომ არჩევნები ჩაატარო, ზუსტად ეგ რიცხვები დაჯდება. ტენდენცია არის ეგ, რომ ქართული ოცნება ძალაუფლებას კარგავს.

ერთია მათი წინასაარჩევნო კამპანია, რასაც ლაპარაკობენ და იძახიან, რომ თითქოს არ იქნება ხელახალი არჩევნები და ეს არ არის რეფერენდუმი და ა.შ. და მეორე, რომ დადგება ეს რეალობა მერე რას იზამენ, მოუწევთ და ეს ქვეყანა გავა მომავალ წელს ხელახალ არჩევნებზე", — აცხადებს ჯაფარიძე.

მთავარი არხის დაკვეთით ჩატარებული IPSOS-ის კვლევის თანახმად, ხვალ რომ თვითმართველობის არჩევნები ტარდებოდეს, გამოკითხულთა 35% ხმას ქართულ ოცნებას მისცემდა, 30% ნაციონალურ მოძრაობას, 9% კი გიორგი გახარიას პარტიას. რაც შეეხება მერობის კანდიდატებს, გამოკითხულთა 41% კახა კალაძეს, 36% ნიკა მელიას, 13% კი გიორგი გახარიას მისცემდა ხმას.

მთავარი არხის ინფორმაციით, მათი დაკვეთით ჩატარებულ კვლევაში IPSOS-ის მიერ პირდაპირი ინტერვიუს მეთოდით, გამოიკითხა არჩევნებში მონაწილეობის უფლების მქონე, შემთხვევითობის პრინციპით შერჩეული 1 500 რესპოდენტი. კვლევა ჩატარდა 21-დან 25 სექტემბრის პერიოდში. მონაცემების ცდომილების ზღვარი პლუს-მინუს 3%-ია.

ამავე თემაზე: