ფინანსთა მინისტრის, ლაშა ხუციშვილის შეფასებით, IPSOS-ის კვლევის შედეგები რეალურ სურათს არ შეესაბამება. მისი თქმით, რეალური რიცხვები 5 დღეში გამოქვეყნდება.

"ყოველი არჩევნების წინ ჩვენ ვხედავთ გარკვეულ კვლევებს, მათ შორის, IPSOS-ისა და სხვა კომპანიების მხრიდან. ასევე, ვხედავთ იმ პროცესს, როცა მნიშვნელოვნად ცდომილება არის ხოლმე გამოქვეყნებულ პროგნოზებსა და რეალურ სურათს შორის. რა თქმა უნდა, ყველაზე მნიშვნელოვანი რიცხვები გამოქვეყნდება სულ რაღაც 5 დღეში. შესაბამისად, ჩვენ მოგვიწევს დაცდა ამ პერიოდისთვის და ვნახავთ რეალურ შედეგებს", — აცხადებს ის.

მთავარი არხის დაკვეთით ჩატარებული IPSOS-ის კვლევის თანახმად, ხვალ რომ თვითმმართველობის არჩევნები ტარდებოდეს, ქვეყნის მასშტაბით გამოკითხულთა 35% ხმას ქართულ ოცნებას მისცემდა, 30% ნაციონალურ მოძრაობას, 9% კი გიორგი გახარიას პარტიას.

მთავარი არხის ინფორმაციით, მათი დაკვეთით ჩატარებულ კვლევაში IPSOS-ის მიერ პირდაპირი ინტერვიუს მეთოდით, გამოიკითხა არჩევნებში მონაწილეობის უფლების მქონე, შემთხვევითობის პრინციპით შერჩეული 1 500 რესპოდენტი. კვლევა ჩატარდა 21-დან 25 სექტემბრის პერიოდში. მონაცემების ცდომილების ზღვარი პლუს-მინუს 3%-ია.