ქართული ოცნების აღმასრულებელი მდივანი მამუკა მდინარაძე ფიქრობს, რომ საქართველოში ევროკავშირის ელჩის, კარლ ჰარცელის მიერ გავრცელებული განცხადება მელიასა და კობახიძის დაპირისპირებაზე, არაობიექტურია. ამის შესახებ მდინარაძემ რუსთავი 2-ის ეთერში ისაუბრა.

"არ ვიცი, რამდენ ადამიანს მიაჩნია, რომ ეს ობიექტური განცხადებაა. ვინც არ უნდა იყოს განცხადების ავტორი, ჩვენი ძალიან დიდი პატივისცემის მიუხედავად თუნდაც კონკრეტული ადამიანის მიმართ, ასევე, განსაკუთრებით, ევროკავშირის მიმართ, მის წარმომადგენელზეა საუბარი, განცხადება უნდა იყოს ობიექტური და თუ ეს ობიექტური არ იქნება, ჩვენ ამას აუცილებლად აღვნიშნავთ. ამ შემთხვევაში მისი ეს განცხადება იყო არაობიექტური", — განაცხადა მდინარაძემ.

მამუკა მდინარაძემ ისიც აღნიშნა, რომ ჰარცელის განცხადების არაობიექტურობა იმაში მდგომარეობდა, რომ მან არაფერი თქვა ნაციონალური მოძრაობის ერთ-ერთი ლიდერის მიერ წამოწყებულ "პროვოკაციაზე".

"მას გამორჩა ეთქვა მთავარი, რომ ეს იყო მძიმე პროვოკაცია, ერთი პარტიის ფორმალური, მაგრამ, თავმჯდომარის მხრიდან მეორე, ამ შემთხვევაში, მმართველი პარტიის თავმჯდომარის მიმართ. როდესაც ეს გამოგრჩება, ბრჭყალებში, ან მის გარეშე, ასეთი განცხადება იმ მოვლენების აღსანიშნავად არ არის ობიექტური", — თქვა ქართული ოცნების ერთ-ერთმა ლიდერმა.

ევოკავშირის ელჩმა საქართველოში, კარლ ჰარცელმა, 23 სექტემბერს ევროკავშირის წარმომადგენლობის ოფისის წინ ნიკა მელიასა და ირაკლი კობახიძეს შორის დაპირისპირების შესახებ განცხადება გაავრცელა და დაწერა, რომ წუხს ამ ფაქტის გამო. მისი თქმით, მისასალმებელია კობახიძის მხრიდან ბოდიშის მოხდა.

გუშინ 23 სექტემბერს, ევროკავშირის ოფისთან, ნიკა მელია და ირაკლი კობახიძე ერთმანეთს დაუპირისპირდნენ. ინციდენტი მაშინ მოხდა, როცა კობახიძე ჟურნალისტებს კომენტარს აძლევდა. ადგილზე მელიას მისვლის შემდეგ ჯერ სიტყვიერი დაპირისპირება დაიწყო, შემდეგ კი ერთმანეთისკენ ფიზიკურად გაიწიეს.