საქართველოს პარლამენტის წევრმა, სალომე სამადაშვილმა ნიკა მელიასა და ირაკლი კობახიძის დაპირისპირების შესახებ განაცხადა, რომ ეს დაბალი პოლიტიკური კულტურის მაჩვენებელია.

"მე ვფიქრობ, რომ ბატონი ჰარცელის განცხადებაში ყველაფერი იყო ნათქვამი, რაც უნდა ყოფილი თქმული ამ ვითარებაში იმიტომ, რომ ნამდვილად სამწუხაროა, რომ ასეთი დაბალი პოლიტიკური კულტურა გვაქვს, სამწუხაროდ, ჩვენს ქვეყანაში, რომ ასეთი ინციდენტები ხდება. მე ამას ასე აღვიქვამ და მოვისმინე დღეს მმართველი გუნდის განმარტებები, რომ სხვა ქვეყნებშიც ხდება ფიზიკური, თუ თითქმის ფიზიკური თავდასხმა ერთმანეთზე. გასაგებია, სადაც არ უნდა ხდებოდეს, მე პირადად მიმაჩნია, რომ ეს არის დაბალი პოლიტიკური კულტურის მაჩვენებელი იმიტომ, რომ სიტყვებით უნდა შეგვეძლოს და ცივილიზებულად კომუნიკაცია. მე ასე ვფიქრობ", — განაცხადა სამადაშვილმა პალიტრანიუსის ეთერში.

გუშინ 23 სექტემბერს, ევროკავშირის ოფისთან, ნიკა მელია და ირაკლი კობახიძე ერთმანეთს დაუპირისპირდნენ. ინციდენტი მაშინ მოხდა, როცა კობახიძე ჟურნალისტებს კომენტარს აძლევდა. ადგილზე მელიას მისვლის შემდეგ ჯერ სიტყვიერი დაპირისპირება დაიწყო, შემდეგ კი ერთმანეთისკენ ფიზიკურად გაიწიეს.

ისინი ერთმანეთს ხელებს უქნევდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.