ბავშვთა სამყაროში 30 იანვარს გაჩენილი ხანძრით დაზარალებულები მთავრობის ადმინისტრაციის შენობასთან აქციას მართავენ. მათი აქცია რამდენიმე საათია მიმდინარეობს და წვიმის მიუხედავად, არ დაშლილან.

როგორც აქციის მონაწილეები ამბობენ, მათ მთავრობის კანცელარიასთან კარავი მიჰქონდათ, რომელიც სამოქალაქო ტანსაცმელში ჩაცმულმა პირმა წაართვა. მათი ვარაუდით, პირი, რომელმაც კარავი წაართვათ სამოქალაქო ტანსაცმელში ჩაცმული პოლიციის თანამშრომელი იყო.

საწყის ეტაპზე, აქციის მონაწილეები თბილისის მერიის შენობასთან შეიკრიბნენ და კარვების გაშლის ნებართვას ითხოვდნენ. თუმცა, მოგვიანებით, როგორც მათთვის გახდა ცნობილი მერიის ნებართვა არ სჭირდებოდა.

თბილისში, სავაჭრო ცენტრ ბავშვთა სამყაროში 30 იანვარს, გამთენიისას გაჩენილი ხანძრის შედეგად სრულიად განადგურდა შენობა, დაზარალდა ათობით მოვაჭრე, რომლებსაც სავაჭრო ცენტრში და მის მიმდებარე ბაზრობებზე ტანსაცმლის, ავეჯის, ოქრო-ვერცხლის მაღაზიები ჰქონდათ.