ქართული ოცნების თავმჯდომარე, ირაკლი კობახიძე ამტკიცებს, რომ მთავარი არხის ოპერატორი ჟურნალისტის წინასწარ დაგეგმილი პროვოკაციის გამო დაშავდა. მისი თქმით, არხის დირექტორი ნიკა გვარამია სიცრუეს ავრცელებს, როდესაც ამბობს, რომ მისი თანამშრომელი მეორე სართულიდან გადააგდეს.

"პირველ რიგში, ძალიან სამწუხაროა, რომ კონკრეტული ჟურნალისტის წინასწარ დაგეგმილი პროვოკაციის გამო დაშავდა ოპერატორი [...] რაც მოხდა რეალურად, არის მძიმე, თავისი პროვოკაციით და შემდეგ თავისი გაფორმებით. გაფორმებას რაც შეეხება, გაავრცელეს ასეთი ინფორმაცია, მას შემდეგ რაც მოხდა ეს ფაქტი, რომ თითქოს მეორე სართულიდან გადააგდეს ოპერატორი და რომ ის იყო მძიმე მდგომარეობაში.

სინამდვილეში მოხდა ის, რომ იყო მისული კონკრეტული ჟურნალისტი ოპერატორთან ერთად ქარელის ოფისში და იმ დროს, როდესაც ხდებოდა გადაღება, ოპერატორმა მოაჯირზე წონასწორობა ვერ შეინარჩუნა და გადავარდა, რასთან დაკავშირებითაც იმედი გვაქვს, რომ კონკრეტული ჩანაწერებიც იქნება", — აცხადებს კობახიძე.

მთავარი არხის ინფორმაციით, ქარელში, ქართული ოცნების წევრებმა მათი ოპერატორი პარტიის შტაბის მეორე სართულიდან გადმოაგდეს. როგორც ჟურნალისტი ბექა ყორშია ყვება, მმართველი პარტიის შტაბის წევრები მისვლისთანავე აგრესიულად შეხვდნენ. მისი თქმით, იყო ფიზიკური დაპირისპირებაც.

ინციდენტის შემდეგ, ქართული ოცნების ოფისში სპეციალური ბრიფინგი გაიმართა, სადაც პარტიის აღმასრულებელმა მდივანმა, მამუკა მდინარაძემ განაცხადა, რომ მთავარი არხის ოპერატორი პარტიის ქარელის შტაბის მეორე სართულიდან შემთხვევით გადმოვარდა. ის ადასტურებს, რომ შტაბის წევრებსა და ტელევიზიის გადამღებ ჯგუფს შორის სიტყვიერი დაპირისპირება იყო, თუმცა გამორიცხავს ფიზიკურ შეხებას.

საქმეზე გამოძება სისხლის სამართლის კოდექსის 124-ე მუხლით დაიწყო, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.