პარტია საქართველოსთვის თავმჯდომარე, გიორგი გახარია აცხადებს, რომ გავრცელებული ფაილების გამო ქართული ოცნება პანიკაშია. მისი თქმით, სწორედ ამის გამოხატულებაა ის, რომ მმართველი პარტიის ლიდერები გამოძიების დასრულებამდე საზოგადოებას სხვადასხვა ვერსიას სთავაზობს.

"დღეს გამოვიდნენ, გამოძიება ერთი დღეს დაწყებული არ არის და უკვე საზოგადოებას ვერსიებს სთავაზობენ. როგორ წარმოგიდგენიათ, გუშინ დაწყებულ გამოძიებაზე პრემიერმინისტრი, არჩევნების კამპანიაში ჩართული მოქმედი მერი, პარტიის თავმჯდომარე გამოდიან და საზოგადოებას სთავაზობენ თავის სუბიექტურ ვერსიას იმ გამოძიებაზე, რომელიც დღეს დაიწყო", — განაცხადა გიორგი გახარიამ.

ის ამბობს, რომ "ნორმალურ ქვეყნებში" მმართველი პარტია უფრო პასუხისმგებლიანად და თანმიმდევრულად იქცევა.

ჩანაწერების გავრცელების შემდეგ ქართული ოცნების თავმჯდომარემ, ირაკლი კობახიძემ განაცხადა, რომ რომ ნაციონალური მოძრაობიდან მიღებული ინფორმაციის მიხედვით, ისინი წინასაარჩევნოდ მძიმე პროვოკაციას ამზადებენ.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: