შინაგან საქმეთა სამინისტროს წარმომადგენლის ინფორმაციით, ყვარელში, საქართველოს ბანკში შეჭრილი პირის ყველა მძევალი გათავისუფლებულია. მისივე განცხადებით, სპეცოპერაცია გრძელდება.

"ყველა მძევალი არის თავისუფალი, შეტყობინების მიღებისთანავე სამართალდამცველებმა დაიწყეს აქტიური საგამოძიებო მოქმედებები, ადგილზე იმყოფებიან სხვადასხვა დანაყოფის წარმომადგენლები, ამ წუთებშიც მიმდინარეობს ღონისძიება", — განაცხადა შსს-ს სტრატეგიული დეპარტამენტის ხელმძღვანელმა, ქეთი კოვზიაშვილმა.

მას არ დაუკონკრეტებია, რას ითხოვდა თავდამსხმელი, რამდენი მძევალი ჰყავდა მას და რამდენი ხნის განმავლობაში გრძელდებოდა სპეცოპერაცია.

"არის ეს პირი შეიარაღებული, მიმდინარეობს ახლაც სპეცოპერაცია, თანხასთან დაკავშირებით, რა თქმა უნდა, იყო მოთხოვნა. ამ ეტაპზე დამატებითი ინფორმაციის მოწოდება არ შემიძლია. მიმდინარეობს პირის იდენტიფიცირების პროცესიც", — განაცხადა კოვზიაშვილმა.

საქართველოს შინაგან საქმეთა სამინისტრომ ყვარელში, ბანკში შეიარაღებული პირის შესახებ ინფორმაცია დღეს, 9 სექტემბერს, დაახლოებით 15:00 საათზე გაავრცელა. უწყებაში არ აკონკრეტებდნენ, ჰყავდა თუ არა მძევლები ბანკში შეჭრილ პირს.