თბილისის მერის, კახა კალაძის განცხადებით, შანაე ბრუკის საქმეზე ბრალდებულ რაფაელ მურსაკულოვს ფოტოები მელიასთან და რურუასთან ერთადაც აქვს გადაღებული, მაგრამ ეს წამოსაწევი თემა არ არის. მისივე თქმით, მნიშვნელობა არ აქვს, ვინ იქნება დამნაშავე, ის კანონის სრული სიმკაცრით დაისჯება.

"ქართული ოცნება ვინმეს რომ მფარველობდეს, ეს შედეგი არ დადგებოდა. შესაბამისად, ვისაც დანაშაული აქვს, არ აქვს მნიშვნელობა ქართული ოცნების წევრი იქნება, ჩემი მამა იქნება, ჩემი შვილი იქნება, ყველა აგებს პასუხს დანაშაულისთვის კანონის სრული სიმკაცრით. [...] ქართულ ოცნებასთან, მელიასთან და რურუასთან აქვს ფოტოები გადაღებული, ეგ საერთოდ რა წამოსაწევი თემაა. ნახეთ, იცით რამდენ ადამიანთან მაქვს ფოტო გადაღებული. [...] ამბობს რომ მხარდამჭერია. მხარდამჭერი იყო ნიკა მელიასი, იგივე რურუასი. გაზიარებული აქვს გახარიას ფოტო, გაზიარებული აქვს ჩემი ფოტო. რა არის მერე, ამაში დანაშაული რა არის", — თქვა კახა კალაძემ.

მიმდინარე წლის 31 ივლისს გავრცელდა ინფორმაცია, რომ მეგობრები თბილისში ავტრალიის მოქალაქეს, შანაე ბრუკს ეძებდნენ. ისინი Facebook-ზე წერდნენ, რომ ქალი 30 ივლისს, დღის მეორე ნახევრიდან, მთაწმინდის რაიონში სეირნობის შემდეგ დაიკარგა. ბრუკის ერთ-ერთი მეგობრის თქმით, შანაე ბოლოს ტელეფონზე მეგობარს ელაპარაკებოდა, როდესაც მას მოულოდნელად თავს დაესხნენ, ის კი დახმარებისას ითხოვდა. დღის ბოლოს გავრცელდა ინფორმაცია, რომ თბილისში შანაე ბრუკი მთაწმინდის ფერდობზე გარდაცვლილი იპოვეს. 1-ლ აგვისტოს სანამ ბრუკი გარდაცვალების საქმე განზრახ მკვლელობის მუხლით გადაკვალიფიცირდა.

8 სექტემბერს შინაგან საქმეთა სამინისტრომ განაცხადა, რომ ავსტრალიის მოქალაქის, შანაე ბრუკის მკვლელობის საქმე გახსნა და ბრალდებული დააკავა. მათივე ინფორმაციით, ის თბილისში მცხოვრები საქართველოს მოქალაქე, 33 წლის რ.მ.-ა. მისი დაკავების შემდეგ, მედიაში გავრცელდა ინფორმაცია, რომ ბრალდებული ქართული ოცნების წევრი იყო. ფოტოებზე ის პარტიის ლიდერებთან ერთად პოზირებდა და არის დეპუტატ ირაკლი ზარქუას სელფიშიც. ზარქუამ საპასუხოდ თქვა, რომ ეს ფოტოები ორი-სამი წლის წინანდელია. კითხვას, იყო თუ არა ბრალდებული ქართული ოცნების აქტივისტი ან საოლქო კომისიის წევრი, პასუხობს, რომ არ იცის. მისივე განცხადებით, პარტიას "ათობით ათასი წევრი და ასობით ათასი მხარდამჭერი ჰყავს და ყველას ზრახვებსა თუ ფიქრებზე" პასუხს ვერ აგებენ.