ლელო საქართველოსთვის ერთ-ერთი ლიდერის, ბადრი ჯაფარიძის განცხადებით, ქართული ოცნება დაშინების გზით წინასაარჩევნო კამპანიიდან მაჟორიტარი კანდიდატების გამოთიშვას ცდილობს. მისივე თქმით, ამით წინასაარჩევნო პროცესს საფრთხე ექმნება და ეს "განწირული, აგონიაში მყოფი" პოლიტიკური ძალის მიერ გამოყენებული "უმსგავსო მეთოდებია".

"ახალციხეში 4 წევრი დაშინების გზით იქნა გამოყვანილი პარტიული სიიდან. გვქონდა ესეთი შემთხვევა ვანში, როდესაც ჩვენს კანდიდატს უთხრეს, რომ თუკი ის გააგრძელებდა საარჩევნო კამპანიაში აქტიურად მონაწილეობას ლელოს სახელით, მაშინ მისი მეუღლე არ დაფინანსდებოდა ქირურგიული ოპერაციის კუთხით იმიტომ, რომ მისი მეუღლე საჭიროებს სამედიცინო დახმარებას", — თქვა ბადრი ჯაფარიძემ.

მისივე ცნობით, ასეთივე ფაქტი იყო დედოფლისწყაროშიც, სადაც მაჟორიტარი კანდიდატი, იძულებული გახდა, შეეწყვიტა წინასაარჩევნო კამპანია იმის გამო, რომ მისი უახლოესი ნათესავი, რომელიც დასაქმებულია საჯარო სამსახურში, გათავისუფლების საფრთხის წინაშე აღმოჩნდა.

"აი, ესეთი მეთოდებით ცდილობს ქართული ოცნება შეინარჩუნოს ხელისუფლება. რა თქმა უნდა, ეს არის განწირული, აგონიაში მყოფი პოლიტიკური ძალის მიერ გამოყენებული უმსგავსო მეთოდები. ეს ვერ შეცვლის იმ ვერდიქტს, რომელიც ქართველმა ხალხმა გამოუტანა ქართულ ოცნებას", — განაცხადა ბადრი ჯაფარიძემ.

მისი თქმით, ქართული ოცნება ცდილობს, რომ წინასაარჩევნო პროცესიდან მნიშვნელოვანი მაჟორიტარი კანდიდატები გამოთიშოს და ეს განსაკუთრებით რეგიონებში ხდება.

"როგორც მოსალოდნელი იყო, ქართულმა ოცნებამ ჩართო მექანიზმი ამომრჩევლების დაშინების, მათზე ზემოქმედების. [...] არის ახალი, ინოვაციური მეთოდები ქართული ოცნების მიერ შემოღებული, რომელიც მიზნად ისახავს, განსაკუთრებით, რეგიონებში, მინდა, ხაზი გავუსვა, განსაკუთრებით, რეგიონებში, მოხდეს ადამიანების დაშინების გზით მათი ამორთვა პარტიული სიებიდან და ამით შეუქმნას საფრთხე წინასაარჩევნო კამპანიას", — განაცხადა ბადრი ჯაფარიძემ.

აღსანიშნავია, რომ ლელო არ არის პირველი პარტია, ვინც ამაზე საუბრობს. ექსპრემიერის, გიორგი გახარიას პარტიის წარმომადგენლები ბოლო დღეებში აცხადებენ, რომ მათ წევრებს აშინებენ.

"შეგიძლიათ აიღოთ ჩვენი პარტიის საქართველოსთვის სიები — საკრებულოში კანდიდატების სიები — ამ ადამიანებზე პირდაპირ ხდება ზეწოლა, იმისთვის, რომ მათ უარი განაცხადონ სხვადასხვა მიზეზით. შემდგომ ამის მიზანი გახლავთ, რომ რაოდენობა სიის თუ შემცირდა — მერე სია იხსნება არჩევნებიდან", — აღნიშნა გიორგი გახარიამ.

საპასუხოდ კი მისმა კონკურენტმა და ქართული ოცნების გენერალურმა მდივანმა, კახა კალაძემ თქვა, რომ გიორგი გახარიას გადაწყვეტილებამ საკუთარი კანდიდატურა დაეყენებინა თბილისის მერობის არჩევნებში, ნათელი გახადა, მათ შორის მისი პარტიის წევრებისთვისაც, რომ ის არ არის ქართული ოცნებისა და ბიძინა ივანიშვილის "პროექტი" და სწორედ ამის გამო ტოვებენ პარტიას.