ბათუმში მომხდარ არეულობასთან დაკავშირებით, ექვსი პირი საქართველოს სსკ-ის 225-ე და 353-ე პრიმა მუხლებითაა დაკავებული, რაც მასობრივი არეულობასა და პოლიციელზე ან საჯარო დაწესებულებაზე თავდასხმას გულისხმობს. ამის შესახებ შინაგან საქმეთა სამინისტროს პრესსამსახური ავრცელებს ინფორმაციას.

მასობრივი არეულობა ისჯება თავისუფლების აღკვეთით ვადით ექვსიდან ცხრა წლამდე, ხოლო პოლიციის მუშაკის ან ხელისუფლების სხვა წარმომადგენლის მიმართ წინააღმდეგობა საზოგადოებრივი წესრიგის დაცვისათვის ხელის შეშლის მიზნით, ჩადენილი ჯგუფის მიერ, ისჯება თავისუფლების აღკვეთით ვადით ოთხიდან შვიდ წლამდე.

შსს-ს ცნობით, სხვა პირთა იდენტიფიცირებისა და მტკიცებულებების მოპოვების მიზნით გრძელდება საგამოძიებო მოქმედებები.

11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.