შინაგან საქმეთა სამინისტროს განცხადებით, ავსტრალიის მოქალაქის, შანაი ბრუკის მკვლელობის საქმე გახსნეს და ბრალდებული დააკავეს. მათივე ინფორმაციით, 1988 წელს დაბადებული, თბილისში მცხოვრები საქართველოს მოქალაქე, რ.მ. 8 სექტემბერს დააკავეს.

შსს-ს ინფორმაციით, 31 ივლისს ნაპოვნ ცხედარს ძალადობის კვალი აღენიშნებოდა. ცხედრის დათვალიერების შედეგად ამოიღეს საქმისთვის მნიშვნელოვანი არაერთი ნივთი, ასევე, დანაშაულის ჩადენის იარაღი, დანა, რომელიც დაზიანებული იყო.

"აღნიშნულ დანაშაულთან სავარაუდოდ შემხებლობაში მყოფი რამდენიმე ათეული პირისგან აღებულ იქნა ბიოლოგიური ნიმუშები, რომლებზეც დაინიშნა გენეტიკური ექსპერტიზები. მოხდა თითოეული მათგანის დეტალური გამოკითხვა, მათ მიერ გამოძიებისთვის მიცემული ინფორმაცია ალიბები, თუ სად იმყოფებოდნენ შანაი ბრუკის გარდაცვალების დროს, გადამოწმდა სხვადასხვა საგამოძიებო მოქმედებებით. კომპლექსური და მრავალმხრივი საგამოძიებო ღონისძიებების შედეგად მინიმუმამდე შემცირდა ზემოთ აღნიშნულ პირთა წრე, ხოლო, გენეტიკური ექსპერტიზის დასკვნით, უტყუარად დადასტურდა ბრალდებულის ვინაობა", — აცხადებენ შსს-ში.

უწყების ინფორმაციით, ავსტრალიის მოქალაქე ბოლო ერთი წლის განმავლობაში დროებით ცხოვრობდა თბილისში გოგებაშვილის პირველ შესახვევში, მეგობრების განმარტებით, იგი ხშირად სეირნობდა მთაწმინდის პარკის მიმდებარედ არსებულ ტყის მასივში. 30 ივლისს ის მეგობრებს უნდა შეხვედროდა, თუმცა არ მივიდა დათქმულ დროს და მას შემდეგ მასთან კომუნიკაცია შეწყდა, რაზეც მოგვიანებით მეგობრებმა სამართალდამცავებს აცნობეს.

შსს-ს წარმომადგენელმა საგამოძიებო მოქმედებების შესახებაც ისაუბრა. კერძოდ, უწყების ინფორმაციით, ჩატარდა რამდენიმე ასეული საგამოძიებო მოქმედება, გამოიკითხა 200-ზე მეტი პირი, მათ შორის, გარდაცვლილი ქალის მეგობრები, თანამშრომლები, მეზობლები, დანაშაულის დღეს მთაწმინდის პარკის ტერიტორიაზე მყოფი და იქ დასაქმებული პირები, მათგან მიღებული ინფორმაციის საფუძველზე კი შეიქმნა ფოტორობოტი, რომელიც გაეგზავნა ყველა ოპერატიულ დანაყოფს.

"საერთაშორისო საპოლიციო თანამშრომლობისა და სამართლებრივი დახმარების ფარგლებში განხორციელდა სხვადასხვა სახის ღონისძიება:

კერძოდ, დისტანციურად გამოკითხულ იქნა ამერიკის შეერთებულ შტატებში მყოფი, შანაე ბრუკის მეგობარი, რომელთანაც შანაე ბრუკს გარდაცვალებამდე ჰქონდა კომუნიკაცია, სოციალური ქსელის მეშვეობით.

ასევე, შემთხვევის ადგილიდან ამოღებული, სავარაუდო დამნაშავის ბიოლოგიური კვლები, დნმ-ის ბაზებთან შედარების მიზნით, გადაგზავნილ იქნა ინტერპოლის წევრ 194 სახელმწიფოში", — ამბობენ სამინისტროში.

შსს-ს ცნობით, დანაშაულთან სავარაუდოდ შემხებლობაში მყოფი რამდენიმე ათეული პირისგან აიღეს ბიოლოგიური ნიმუშები, რაზეც დაინიშნა გენეტიკური ექსპერტიზები, გამოიკითხა თითოეული მათგანი, საგამოძიებო ღონისძიებების შედეგად მინიმუმამდე შემცირდა აღნიშნულ პირთა წრე, ხოლო ბრალდებულის ვინაობა გენეტიკური ექსპერტიზით დასკვნით დადასტურდა.

31 ივლისს გავრცელდა ინფორმაცია, რომ თბილისში დაკარგული ავსტრალიის მოქალაქე, შანაე ბრუკი მთაწმინდის ფერდობზე გარდაცვლილი იპოვეს.

შანაე ბრუკის მეგობრები Facebook-ზე წერდნენ, რომ ის 30 ივლისს დღის მეორე ნახევრიდან, მთაწმინდის რაიონში სეირნობის შემდეგ დაიკარგა. ბრუკი ერთ-ერთი მეგობრის თქმით, შანაე ბოლოს ტელეფონზე მეგობარს ელაპარაკებოდა, როდესაც მას მოულოდნელად თავს დაესხნენ, ის კი დახმარებისთვის ყვიროდა.

1-ლ აგვისტოს შანაე ბრუკი გარდაცვალების საქმე განზრახ მკვლელობის მუხლით გადაკვალიფიცირდა.