დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის განცხადებით, 2 ოქტომბრის არჩევნების გადადებასთან დაკავშირებით პოლიტიკოსებმა თავად უნდა იმსჯელონ, რადგან საკოორდინაციო საბჭოზე ექიმები უმცირესობაში არიან. მისივე თქმით, ზოგადად არჩევნები, როგორც შარშან ასევე წელს, ქვეყანაში არსებულ ეპიდემიურ ვითარებაზე გავლენას ახდენს.

"გარკვეულად არჩევნები რომ ზოგადად, შარშანაც და წელსაც თამაშობს როლს ეპიდსიტუაციის განვითარებაში, ან დამძიმებაში და ა.შ [...] იმიტომ, რომ არჩევნები დაკავშირებულია დიდ მობილობასთან", — განაცხადა გამყრელიძემ.

ქვეყანაში არსებული მძიმე ეპიდვითარებიდან გამომდინარე, თვითმმართველობის არჩევნების გადადების აუცილებლობაზე საქართველოს სახალხო დამცველმა, ნინო ლომჯარიამ განცხადება 23 აგვისტოს გააკეთა. აღნიშნულ ინიციატივას პოლიტიკურ სპექტრში აზრთასხვადასხვაობა მოჰყვა.