Georgian Airways-ის კუთვნილი თვითმფრინავი, რომელიც თბილისი-ვენის რეისის შესრულებას ცდილობდა, თბილისის საერთაშორისო აეროპორტში მშვიდობიანად დაეშვა. Georgian Airways-ის დირექტორი რომან ბოკერია ფორმულასთან ამბობს, რომ ტექნიკური ხარვეზი შასის — თვითმფრინავის დაშვებისა და აფრენისთვის საჭირო ბორბლების მექანიზმის არდახურვამ გამოიწვია.

"აფრენის შემდეგ შასი არ დაიხურა. შესაბამისად პილოტმა მიიღო ძალიან სწორი გადაწყვეტილება დამჯდარიყო უკან თბილისის აეროპორტში. ბორტი იყო სავსე საწვავით და საჭირო იყო საწვავის დაწვა, რადგან სავსე ბაკით შეუძლებელი იქნებოდა უსაფრთხოდ დაჯდომა. 6 ტონა დაწვა ხომალდის მეთაურმა, მაღალპროფესიონალურად განახორციელა დაშვება თბილისის საერთაშორისო აეროპორტში ყველანაირი რეგულაციების დაცვით, ყველა მგზავრი არის უსაფრთხოდ", — ამბობს რომან ბოკერია.

მისივე თქმით, მგზავრები მოსაცდელ ტერმინალში არიან გადაყვანილები, ხარვეზი კი გამოსწორებულია და თვითმფრინავს გასაფრენად ამზადებენ.

აღნიშნულის გამო, თბილისის საერთაშორისო აეროპორტში საგანგებო ვითარება იყო გამოცხადებული.