ქაბულში, თალიბების ჰაერში უკონტროლო და "საზეიმო სროლას" სულ მცირე 17 ადამიანი ემსხვერპლა, 50-ზე მეტი კი დაშავდა. Reuters-ის ინფორმაციით, ისინი ავღანეთის ერთ-ერთ რეგიონ პანჯშირში მიღწეულ წარმატებას აღნიშნავდნენ. პანჯშირი ავღანეთის უკანასკნელი რეგიონია, რომელიც ისლამისტური ჯგუფის წინააღმდეგ იბრძვის. ოპოზიციის ლიდერები რეგიონის დაცემას უარყოფენ.

Reuters-ის ცნობით, "საზეიმო სროლას" მსხვერპლი, ასევე, ავღანეთის სხვა რეგიონებშიც მოჰყვა. ნანგარჰარის პროვინციაში ბრმა ტყვიით 14 ადამიანი დაშავდა.

ჰაერში უკონტროლო სროლა თალიბანის პრესსპიკერმა გააკრიტიკა.

"ჰაერში სროლას თავი აარუდეთ, ნაცვლად ღმერთს მადლობა გადაუხადეთ. ტყვიებმა, შესაძლოა, მოსახლეობა დააზიანოს, ამიტომ უმიზეზოდ ნუ ისვრით", — თქვა ზაბიჰულაჰ მუჯაჰიდიმ.

2021 წლის 14 აპრილს აშშ-ის პრეზიდენტმა ჯო ბაიდენმა განაცხადა, რომ ავღანეთიდან ამერიკული ჯარების გაყვანა პირველ მაისს დაიწყებოდა და 31 აგვისტომდე დასრულდებოდა. ავღანეთიდან აშშ-ის ძალების გასვლის შემდეგ, თალიბანმა ქაბულის აღებაც მალე შეძლო — პრეზიდენტი გაიქცა, თალიბებმა ძალაუფლება მოიპოვეს.

მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ძალაუფლების მიღების შემდეგ თალიბებმა არაერთი ადამიანი მოკლეს და დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

31 აგვისტოს ოფიციალურად დასრულდა ევაკუაციის პროცესი და 20-წლიანი ომის შემდეგ ავღანეთი უკანასკნელმა ამერიკელმა სამხედრომაც დატოვა. ქაბულის აეროპორტს ახლა თალიბები აკონტროლებენ.

გაიგე მეტი: