მოქმედმა პრემიერმინისტრმა ჩამოთვალა, რა იყო ინსტიტუტების "დანგრევა და დაკნინება" ყოფილი პრემიერმინისტრის დროს. ირაკლი ღარიბაშვილის განცხადებით, წაიკითხა გიორგი გახარიას კომენტარი, სადაც ის "საუბრობს გულდაწყვეტით ინსტიტუტის დაკნინებაზე თუ დანგრევაზე და რაღაცაზე". მან კიდევ ერთხელ გაიმეორა, რომ ინსტიტუტების დანგრევა და დაკნინება იყო გახარიას გადადგომა, "როცა პრემიერმინისტრი უარს ამბობს კანონის აღსრულებაზე და მისი პირდაპირი მოვალეობის შესრულებაზე.

"პატარა ბავშვივით გაიქცა, გადადგა იმის გამო, რომ ნიკა მელია არ დაეკავებინა პოლიციას", — დასძინა მან.

ღარიბაშვილმა გახარიას კიდევ სამი საქმე ჩამოთვალა, რომლებიც, მისი აზრით, "ინსტიტუტების დარბევა და დაკნინება" იყო.

"ინსტიტუტის დანგრევა და დაკნინება იყოს ის, როცა მან ჩაიყვანა სპეცნაზი პანკისში და მთელ სოფელს აცემინა ქვებით, კაცი არ დაუსჯია მას.

ინსტიტუტის დანგრევა და დაკნინება იყოს ის, როცა შინაგან საქმეთა მინისტრი იყო, რაღაც გაუგებარი სპეცოპერაცია ჩაატარა, კლუბებში შევიდა, ააწიოკა ხალხი, შემდეგ გამოვიდა და... კლუბში ვინც იყვნენ, მათ შეურაცხყოფა მიაყენეს არაერთგზის პოლიციელებს და გამოვიდა და ბოდიში მოუხადა ამ ხალხს, მათ შორის იმ ხალხს, რომელსაც თვითონ ეძახდა ნარკომანებს და ა.შ., აღარ გავაგრძელებ.

ასევე, ინსტიტუტის დანგრევა და დაკნინება არის ის, როცა აბსოლუტურად გაუაზრებლად, უგუნურად დაგეგმილ ოპერაციას, მე ვგულისხმობ გავრილოვის ღამეს ჩატარებულ სპეცოპერაციას, გამოიყვანა სპეცნაზი პარლამენტის გარეთ, მაშინ როცა შიგნით უნდა ყოფილიყო, ნებისმიერი დამწყები სპეციალისტი მაგას აუხსნიდა. აცემინა სამი საათის განმავლობაში, ამას აყურებინა მთელს ქვეყანას, როგორ სცემდნენ აგრესიული ნაცმოძრაობის წევრები ჩვენს საამაყო პოლიციელებს და სპეცნაზელებს, ეს არის სირცხვილი და ეს არის ინსტიტუტის დანგრევა", — განაცხადა ღარიბაშვილმა.

გარდა ამისა, ღარიბაშვილმა უპასუხა გახარიას ვარაუდსაც, რომ არჩევნების შემდეგ ქართული ოცნება დაიშლება.

"თქვენ ნახავთ, გახარია სად იქნება არჩევნების შემდეგ", — თქვა მან.

პრემიერმინისტრმა აღნიშნა ისიც, რომ გახარიას სახელი უკვე დაარქვა ყველამ და მათ შორის, ქართული ოცნების თავმჯდომარემ. ჟურნალისტების კითხვას, რომელ სახელს გულისხმობს, "ბოლს" თუ "მაზაკვალს", ის ასე პასუხობს.

"უფრო მეტიც, უფრო მძიმე. აღარ მინდა გავიმეორო, იცით თქვენ. ღალატია ის, რაც ჩაიდინა მან".

ამასთან, ღარიბაშვილმა გაიმეორა პარტიის მესიჯბოქსი, რომ გახარია, რომელიც გადადგა, რათა არ დაეკავებინათ მელია, ახლა იბრძვის იმისთვის, რომ მელია მეორე ტურში გადაიყვანოს.

"აი, ასეთი, კაცისთვის შეუფერებელი საქციელი ჩაიდინა მან", — დასძინა ღარიბაშვილმა.