თბილისის მერის, კახა კალაძის განცხადებით, გახარიასთან შეხვედრისას არ ყოფილა საუბარი იმაზე, რომ ფინანსური მხარდაჭერის სანაცვლოდ ექსპრემიერი კანდიდატურას არ დააყენებდა, მაგრამ, მისივე თქმით, როცა ამის შესახებ ირაკლი კობახიძე საუბრობს, ის არ ტყუილის. ამის შესახებ მან რუსთავი 2-ზე ისაუბრა.

"ჩემი მხრიდან უხერხული იქნება ამ თემებზე საუბარი, ამიტომ მე თავს შევიკავებდი შევიდე კონკრეტიკაში. რაც შეეხება პარტიის თავმჯდომარეს [ირაკლი კობახიძე], ის არ ტყუის — მესიჯები, რაც მოვისმინეთ მისი მხრიდან. დეტალებში მე არ მინდა ამაზე საუბარი", — აღნიშნავს კალაძე.

მისივე თქმით, გახარიასთან შეხვედრის აუცილებლობა არ არსებობდა და ექსპრემიერს კანდიდატურის დაყენების შესახებ შეეძლო ტელეფონითაც ეთქვა.

"რაზეც იყო საუბარი, რომ ის აყენებდა თავის კანდიდატურას და ეს უნდოდა გაეზიარებინა ჩემთვის, ეს ყველაფერი შესაძლებელი იყო ასევე ტელეფონითაც გაკეთებულიყო, ეს იყო უბრალოდ განცხადება, რომელიც მე გავაკეთე იმასთან დაკავშირებით, რომ ვერ გავიგე შეხვედრის მიზანი რა იყო" — აცხადებს კალაძე.

გიორგი გახარია ამბობს, რომ თუ კალაძემ ნამდვილად ვერ გაიგო მათი შეხვედრის მიზანი, მაშინ შეხვედრას აზრი არც ჰქონია და შეცდა რომ მივიდა.

"თურმე კალაძეს უთქვამს, ვერ გავიგე, რა უნდოდა, რისთვის მოვიდაო, სამწუხაროდ. ეს ნათქვამი მაძლევს მე იმის თქმის შესაძლებლობას, რომ ალბათ, მართლა შევცდი და ტყუილად მივედი" — აღნიშნავს ექსპრემიერი.

1-ლ სექტემბერს ცნობილი გახდა, რომ ექსპრემიერი გიორგი გახარია თბილისის მერობისთვის იბრძოლებს. ამან მისი ყოფილი თანაგუნდელების მორიგი კრიტიკა გამოიწვია. მამუკა მდინარაძის განცხადებით, "მელიასთვის გადადგა და ახლა მელიას მეორე ტურში გასათრევად იწყებს ბრძოლას", ხოლო ირაკლი კობახიძე ამბობს, რომ "არჩევნები არ არის ოლიმპიადა, რომ ბრინჯაოს მედლისთვის იბრძოლო და "მესამე ადგილისთვის არ იბრძვიან არჩევნებში".

იმავე დღეს ქართული ოცნების თავმჯდომარემ, ირაკლი კობახიძემ განაცხადა, რომ ქართული გახარიას მხრიდან მინიშნებები იყო იმასთან დაკავშირებით, რომ თუ "ოცნების" მხრიდან ფინანსური მხარდაჭერა იქნებოდა, ექსპრემიერი თავის კანდიდატურას არ წამოაყენებდა.

გაიგეთ მეტი: