ჯანდაცვის მინისტრის მოადგილის, თამარ გაბუნიას განცხადებით, ჟანგბადის მოხმარების ინტენსივობა გაზრდილია და მოთხოვნის დასაკმაყოფილებლად ეკონომიკის სამინისტრო მუშაობს. მისივე თქმით, სხვადასხვა ქვეყნიდან ხდება იმპორტი.

"ლოჯისტიკური პროცესი არის ძალიან დატვირთული. თუმცა ჯერჯერობით არცერთ კლინიკას პრობლემა ჟანგბადის მიწოდებაში არ შექმნია", — აღნიშნა თამარ გაბუნიამ.

ჯანდაცვის მინისტრის მოადგილე განმარტავს, რომ იყო რიგი შემთხვევები, როდესაც სისტემა იყო გახსნილი და ჟანგბადი იკარგებოდა ისე, რომ პაციენტი მას ვერ იყენებდა. მისივე თქმით, ამ ხარვეზების აღმოსაფხვრელად მუდმივად აქვთ კლინიკებთან კომუნიკაცია და მოუწოდებენ, რომ ჯანდაცვის სამინისტროს გაცემული ჟანგბადის რაციონალური მოხმარების რეკომენდაციები გამოიყენონ.