ციციშვილის საავადმყოფოს კლინიკური დირექტორის, მაია ჩხაიძის თქმით, კორონავირუსის დელტა შტამი განსაკუთრებით სახიფათო ახალშობილთათვისაა. ჩხაიძის თქმით, ციციშვილის კლინიკაში ამ დროისთვის მკურნალობენ სამი, ხუთი და ათი დღის ჩვილებს.

"წლამდე ასაკის ბავშვები არიან განსაკუთრებით სახიფათო დელტა შტამის შემთხვევაში. ოქტომბრის თვიდან ვუყურებთ, კორონავირუსის ინფექციის მიმღები კლინიკა ვარ და არც ერთხელ მძიმე ბავშვი არ ყოფილა და არც ერთხელ არცერთ ბავშვს არ დასჭირვებია წინა პერიოდში მართვით სუნთქვაზე გადაყვანა", — კომენტარი ფორმულას ეთერში გააკეთა მაია ჩხაიძემ.

მან, ასევე, აღნიშნა, რომ ზოგადად ჩვილების შემთხვევაში ვირუსული ინფექცია მძიმედ მიმდინარეობს. მისი შეფასებით პრობლემაა ისიც, რომ მშობელთა უმრავლესობა, რომლებიც მათ კლინიკაში მკურნალობენ, არავაქცინირებულია.

"მოგეხსენებათ ახალშობილებში ყველა ინფექცია მძიმედ მიმდინარეობს, რადგან მათი იმუნური სისტემა არ არის ჯერ ჩამოყალიბებული. ყველა დაავადების მიმართ ისინი ძალიან მგრძნობიარეები არიან. თუ ძუძუთი კვებაზეა ბავშვი და დედას აქვს გადატანილი რაღაც ინფექცია ძუძუთი კვების პერიოდში მას ანტისხეულები და გარკვეულწილად, იმუნიტეტი გადაეცემა. მაგრამ ჩვენს შემთხვევაში, მაგალითად კლინიკის შემთხვევაში შემიძლია ვთქვა, რომ მშობლები რომლებიც ჩვენთან მკურნალობენ, 99,9% არის არავაქცინირებული", — თქვა ჩხაიძემ.