1-ლი სექტემბრიდან პირადობის მოწმობის მიღება უფასოდ შეგეძლებათ. ინფორმაციას ამის შესახებ საქართველოს იუსტიციის სამნისტრო ავრცელებს. უწყება განმარტავს, რომ მიზანი საარჩევნო პროცესში შეუფერხებლად მონაწილეობაა და აქცია 1 თვის განმავლობაში იმოქმედებს.

პირადობის დამადასტურებელი მოწმობის საფასურისგან გათავისუფლდებიან მოქალაქეები, რომელთა 2021 წლის პირველ ოქტომბრამდე საქართველოს მოქალაქის პირადობის დამადასტურებელ ყველა დოკუმენტს (მათ შორის, სამსახურებრივ პასპორტს), მოქმედების ვადა ამოეწურება და მათ სახელზე არ დაფიქსირდება იურიდიული ძალის მქონე საქართველოს მოქალაქის პირადობის დამადასტურებელი არც ერთი დოკუმენტი (მათ შორის, სამსახურებრივი პასპორტი);

გარდა ამისა, პირადობის მოწმობას უფასოდ აიღებენ:

  • საქართველოს ის სრულწლოვანი მოქალაქეები, რომელთა სახელზეც ამ დრომდე არ იყო გაცემული საქართველოს მოქალაქის პირადობის დამადასტურებელი არც ერთი დოკუმენტი;
  • მოქალაქეები, რომელთა პირადობის დამადასტურებელი დოკუმენტების ფოტოსურათები გამოუსადეგარია (უხარისხოა), ან არ ინახება სახელმწიფო სერვისების განვითარების სააგენტოს მონაცემთა ელექტრონულ ბაზაში.

შესწორება: მასალი გამოქვეყნებიდან რამდენიმე საათში იუსტიციის სამინისტრომ ახალი განცხადება გაავრცელა, სადაც უწყება ამბობს, რომ წინაში "მცირე უზუსტობა" იყო. ამჟამად On.ge-ს ტექსტში ეს ნაწილი გასწორებულია. პირველ ვერსიაში, რომელიც ასევე სამინისტრომ გაავრცელა, ჩამონათვალი ასეთი იყო:

პირადობის დამადასტურებელი მოწმობის საფასურისგან გათავისუფლდებიან საქართველოს ის სრულწლოვანი მოქალაქეები, რომელთა სახელზე ამ დრომდე საქართველოს მოქალაქის პირადობის დამადასტურებელი არც ერთი დოკუმენტი არ იყო გაცმული. ამასთან, ის არასრულწლოვანი მოქალაქეები, რომელთაც პირველ ოქტომბრამდე უსრულდებათ 18 წელი. აქციით ისარგებლებენ ის მოქალაქეებიც, რომელთა პირადობის მოწმობის ფოტოსურათები უხარისხოა ან არ ინახება სახელმწიფო სერვისების განვითარების სააგენტოს მონაცემთა ელექტრონულ ბაზაში.

გარდა ამისა, პირადობის მოწმობას უფასოდ აიღებენ:

  • რეგისტრაციიდან მოხსნილი პირები, თუ ისინი დარეგისტრირდებიან კორექტულ მისამართზე;
  • მისამართის გარეშე რეგისტრირებული მოქალაქეები, იმ შემთხვევაში თუ ისინი რეგისტრაციას კორექტულ მისამართზე გაივლიან;
  • მოქალაქეები, რომელთაც არ აქვთ იურიდიული ძალის მქონე არც ერთი დოკუმენტი;
  • ის პირები, რომლებიც რეგისტრირებული არიან საქართველოს ოკუპირებულ ტერიტორიაზე და არ ფლობენ იძულებით გადაადგილებული პირის სტატუსს; ამასთან, გაუქმებული აქვთ პირადობის მოწმობა.

სამინისტროს ინფორმაციით, დოკუმენტის გაცემისას მოქალაქეები როგორც პირადობის მოწმობის, ისე ფოტოსურათის გადაღების საფასურისგან გათავისუფლდებიან. აღსანიშნავია ისიც, რომ აქციით სარგებლობა ადამიანს მხოლოდ ერთხელ შეუძლია.

იმ მოქალაქეებმა, რომელთაც სურთ აქციით სარგებლობა, იუსტიციის სახლებს, სახელმწიფო სერვისების განვითარების სააგენტოს ტერიტორიულ სამსახურებს ან საზოგადოებრივ ცენტრებს უნდა მიმართონ. იუსტიციის სამინისტროს განცხადებით, დამატებითი ინფორმაციის მიღება შესაძლებელია სახელმწიფო სერვისების განვითარების სააგენტოს ცხელ ხაზზე: 32 2 40 10 10.