დიდხნიანი ლოდინის, რამდენიმე საჯარო კონცერტისა და მედიაში მრავალი სპეკულაციის შემდეგ, 29 აგვისტოს კანიე ვესტის ახალი ალბომი გამოვიდა.

ამერიკელი რეპერის მეათე სტუდიურ ალბომს Donda ჰქვია და მასში 27 მუსიკალური ჩანაწერია შესული, რომელთა საერთო ხანგრძლივობა თითქმის ორი საათია.

მართალია, ამ ფაქტის გამო კანიე ვესტის ერთგული მსმენელები გახარებულები არიან, მაგრამ თავად მომღერალი დიდად კმაყოფილი არ ჩანს: ინსტაგრამზე გამოქვეყნებულ პოსტში განაცხადა, რომ ხმის ჩამწერმა კომპანია Universal Music Group-მა მისი ნებართვის გარეშე გაავრცელა ალბომი.

"UNIVERSAL-მა ჩემი ნებართვის გარეშე გამოუშვა ალბომი და მათ [სიმღერა] JAIL 2 დაბლოკეს", — ვკითხულობთ პოსტში, რომელიც კანიემ ალბომის გავრცელებიდან რამდენიმე საათში პირად გვერდზე გამოაქვეყნა.

სიმღერა, სახელწოდებით Jail Pt 2, როგორც მომღერალმა აღნიშნა, ალბომის გამოშვებიდან რამდენიმე საათის გამავლობაში მართლაც მიუწვდომელი იყო ისეთ სტრიმინგ სერვისებზე, როგორიც, მაგალითად, Spotify-ია. მოგვიანებით ამ სიმღერაზეც აღდგა წვდომა და მსმენელებს უკვე მისი მოსმენაც შეუძლიათ.

ჩვეულებრივ, როცა სტრიმინგ სერვისზე რომელიმე სიმღერა დაბლოკილია, ეს საავტორო უფლებას ან სხვა მსგავს პრობლემას ეხება. აღსანიშნავია, რომ მუსიკალური ჩანაწერი Jail Pt 2 კანიემ მერილინ მენსონთან და რეპერ DaBaby-თან ერთად შექმნა, რის გამოც ეს ჩანაწერი თავიდანვე კრიტიკის სამიზნე გახდა: ბოლო პერიოდში მენსონი არაერთმა ქალმა დაადანაშაულა სექსუალურ ძალადობაში, DaBaby კი ჰომოფობიური განცხადებების გამო გაეხვა კრიტიკის ქარცეცხლში.

კანიე ვესტის ბრალდებებს ჯერჯერობით ხმის ჩამწერი კომპანიის წარმომადგენლები ოფიციალურად არ გამოხმაურებიან.