საქართველომ ქაბულის აეროპორტში მყოფი ხალხისთვის სასმელი წყალი გაგზავნა.

მთავრობის ადმინისტრაციის უფროსის მოადგილის, რევაზ ჯაველიძის თქმით, საქართველო საერთაშორისო პარტნიორების გვერდით დგას და აქტიურადაა ჩართული როგორც ჰუმანიტარული, ისე საევაკუაციო პროცესების მართვაში.

"როგორც მოგეხსენებათ, ავღანეთში განვითარებულმა მოვლენებმა დაგვაყენა მასშტაბური ჰუმანიტარული კრიზისის საფრთხის წინაშე. საქართველო ამ პროცესში კვლავ დგას საერთაშორისო პარტნიორების გვერდით და აქტიურად არის ჩართული, როგორც ჰუმანიტარული, ისე საევაკუაციო პროცესების მართვაში. საქართველოს პრემიერმინისტრის გადაწყვეტილებით, დღეს, ავღანეთში, კერძოდ ქაბულის აეროპორტში მყოფი ხალხისთვის, ჰუმანიტარული დახმარების სახით, გაიგზავნა სასმელი წყალი. შეგახსენებთ, რომ საქართველო აქტიურად მონაწილეობს საერთაშორისო ძალისხმევაში ავღანეთიდან საერთაშორისო ორგანიზაციებისა და ინსტიტუტების თანამშრომლებისა და პარტნიორების სასწრაფო ევაკუაციის მიზნით", — განაცხადა ჯაველიძემ.

გარდა ამისა, გუშინ, 26 აგვისტოს, ცნობილი გახდა, რომ ქაბულიდან ევაკუირებული ადამიანები სხვადასხვა ქვეყანაში თბილისის აეროპორტის გავლით გადაჰყავთ. კერძოდ, საქართველოს მთავრობის ადმინისტრაციის განცხადებით, თბილისის აეროპორტში განლაგდა NATO-ს სამხედრო-სატრანსპორტო გადაზიდვების ორგანიზაციის სამხედრო-სატვირთო თვითმფრინავები, რომლებიც ყოველდღიურად ასრულებენ ფრენებს ქაბულის მიმართულებით, ხოლო ქაბულიდან თბილისის აეროპორტში ევაკუირებული მგზავრები სხვადასხვა ჩარტერული რეისებით გადაჰყავთ.