დაავადებათა კონტროლის ცენტრის, ამირან გამყრელიძის განცხადებით, Sinopharm-ის მარაგები მალე შეივსება და ქვეყანა 100 ათასამდე დოზას მიიღებს. გამყრელიძე განმარტავს, რომ Sinopharm-ის პირველ დოზებზე რეგისტრაცია დროებით შეიზღუდა რადგან ელოდებიან შემდეგ პარტიას და ხაზს უსვამს, რომ შეზღუდვა ეხება მხოლოდ და მხოლოდ პირველი დოზის დაჯავშნას — ხოლო მათ, ვისაც დღემდე დაჯავშნილი აქვს ამ ვაქცინის პირველი დოზა, ან სჭირდებათ მეორე დოზის გაკეთება, პრობლემა არ შეექმნებათ.

"ქვეყანამ იყიდა სინოფარმის 600 ათასი დოზა. ეს საკმარისია 300 ათასი ადამიანის ორჯერადად აცრისთვის, ამიტომ გადადებულია ეს 300 000 დოზა, ვინც მეორეჯერ იცრება ან უნდა აიცრას, შენახულია ყველასთვის. პირველ აცრაზე ავედით სადღაც 260-270 ათასზე და პლუს კიდევ ვისაც დაჯავშნილი აქვს. ამიტომ, რაღაც გაუგებრობა რომ არ მოხდეს, სანამ მეორე პარტია [არ ჩამოვა] და ველოდებით მალე 100 000 დამატებით დოზას Sinopharm-ის.

მანამდე მინდა განვმარტო — მხოლოდ პირველ დოზაზე და ჩაუწერლად მისვლაზე შეიზღუდა. ვისაც პირველი აცრა აქვს დაჯავშნილი, ყველა აიცრება, მეორე აცრა ვისაც აქვს დაჯავშნილი, ან შეუძლია ჯავშნის გარეშე მივიდეს და აიცრება", — განაცხადა მან.

ასევე, გამყრელიძემ აღნიშნა, რომ ქვეყანაში არის სხვა ვაქცინებიც და მსურველებს შეუძლიათ აიცრან.

"ჩვენ ვთავაზობთ, ვისაც ჩინური ვაქცინა უნდა, იგივე დამცველობითი უნარი აქვს Sinovac-ს, რომელიც გვაქვს საკმაოდ და უკვე 100 ათასამდეა Sinovac-ზე აცრა. ასევე, რა თქმა უნდა Pfizer, რომელიც გვაქვს სერიოზული რაოდენობით, თვის ბოლოს კიდევ ველოდებით 400 ათასი დოზა Pfizer-ს, ანუ ის მილიონი რაც გვაქვს ნაყიდი, იქიდან თითქმის უკვე სულ შემოვა. ამიტომ ჩვენ სექტემბერს შევხვდებით სადღაც მილიონი დოზა Pfizer-ით. აქედან დაახლოებით 250-300 ათასი დოზა დაჯავშნილია მეორე აცრებისთვის და პირველი აცრებისთვის, ანუ ჩვენ სექტემბერში თავისუფლად შეგვიძლია, რომ სადღაც 350 000 ადამიანი ორჯერადად ავცრათ Pfizer-ით", — განცახადა მან.

ამ თემაზე ისაუბრა ჯანდაცვის მინისტრმაც და აღნიშნა, რომ ყველა ვაქცინის მოხმარება თანაბრად უნდა მოხდეს:

"ჩვენ გვაქვს ძალიან დიდი რაოდენობით სხვა ალტერნატიული ვაქცინებიც და მნიშვნელოვანი არის, რომ ყველა ვაქცინის თანაბარი მოხმარება მოხდეს. რა თქმა უნდა, საჭიროების შემთხვევაში მოხდება დამატება, თუმცა ამ ეტაპისთვის მოქალაქეებს აქვთ ალტერნატიული, აბსოლუტურად იდენტური ვაქცინები, თუნდაც სინოვაკი და მათ აქვთ ხელმისაწვდომობა ამ ვაქცინაზე".

25 აგვისტოს პრემიერმინისტრმა განაცხადა, რომ დამატებით 2 მილიონი დოზა ფაიზერის შემოტანაზე მუშაობენ.

27 აგვისტოს მონაცემებით, საქართველოში კორონავირუსის 4 031 ახალი შემთხვევა დადასტურდა, გამოჯანმრთელდა 4 585, ხოლო გარდაიცვალა — 73 ადამიანი. ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 536 202-ს, მათგან გამოჯანმრთელდა — 473 502, ხოლო ვირუსს ჯამში ემსხვერპლა 7 101 ადამიანი.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები