საქართველოს პროკურატურის ინფორმაციით, ქუთაისის საქალაქო სასამართლომ 15 წელი მიუსაჯა კაცს, რომელმაც საუზმის მომზადებაზე უარის თქმის გამო ცოლი მოკლა.

"საქართველოს შინაგან საქმეთა სამინისტროს მიერ ჩატარებული გამოძიების შედეგად, ბრალდების მხარის მიერ სასამართლოში გამოკვლეული მტკიცებულებებით დადასტურდა, რომ 2020 წლის 23 დეკემბერს, ქ. სამტრედიაში, მ.მ.-მ მეუღლეს ე.კ.-ს, საუზმის მომზადებაზე უარის თქმის გამო, გენდერის ნიშნით შეუწყნარებლობის მოტივით, მოკვლის განზრახვით, დანით ჭრილობა მიაყენა. მიღებული დაზიანების შედეგად ე.კ. ადგილზე გარდაიცვალა", — აცხადებენ უწყებაში.

დაკავებულს ბრალდება საქართველოს სისხლის სამართლის კოდექსის 11 პრიმა 109-ე მუხლის მეორე ნაწილის დ1 და ვ ქვეპუნქტებით ჰქონდა წარდგენილი, რაც ოჯახის წევრის მიმართ დამამძიმებელ გარემოებაში, გენდერის ნიშნით ჩადენილ განზრახ მკვლელობას გულისხმობს.