საქართველოს პრემიერმინისტრის, ირაკლი ღარიბაშვილის განცხადებით, ქვეყანა ყველა სფეროში მუდმივად პროგრესს განიცდის, თუმცა ამას მოსახლეობის მხოლოდ ის ნაწილი ამჩნევს, ვინც ადგილზეა, დანარჩენისთვის კი, კრიტკული მედიის მხრიდან წამოსული "ცილისწამების ნიაღვარის" გამო, შეუმჩნეველი რჩება.

"ჩვენ თუ გადავავლებთ თვალს ბოლო 8 წლის განმავლობაში, იმის მიუხედავად, რომ არაერთი პროექტი განვავითარეთ, განვახორციელეთ, ყველა ქალაქში, ყველა მუნიციპალიტეტში, ყველა რეგიონში გვაქვს რეალური, ხელშესახები პროგრესი. იქნება ეს სოფლის მეურნეობის სამინისტროს მიმართულებით, ეკონომიკის, რეალური წარმოების განვითარების, ინფრასტრუქტურის, რეგიონების განვითარების მიმართულებით თუ სხვა, თუნდაც განათლების მიმართულებით, ჯანდაცვის მიმართულებით გვაქვს საკმაოდ დიდი პროგრესი, მაგრამ მოსახლეობას, რა თქმა უნდა, ამის განცდა აქვს ადგილზე, ვინც ადგილზე უყურებს ამ ყველაფერს, თუმცა ის, ასე ვთქვათ, ის დამაბნეველი ნიაღვარი ცილისწამების და კამპანიის, აგრესიული კამპანიის, რომელიც მოედინება ყოველდღიურად მათ მიერ მართული ტელევიზიებიდან, რა თქმა უნდა, არის ძალიან დიდი შემაფერხებელი. ყოველდღიური სტრესი და ძალადობას ისმენს ჩვენი მოსახლეობა, ჩვენი მოქალაქეები, ჩვენი შვილები, პირდაპირ ძალადობის პროპაგანდა მიმდინარეობს და სიძულვილის პროპაგანდა მომდინარეობს მათი ტელევიზიებიდან", — ამბობს ღარიბაშვილი.

ჩხოროწყუს მერობის კანდიდატის წარდგენისას ღარიბაშვილმა უმეტესი დრო ისევ ნაციონალურ მოძრაობაზე საუბარს დაუთმო. "მჩაგვრელ" ხელისუფლებას ტერორსა და ძალადობაში ადანაშაულებს, კრიტიკულ ტელევიზიებს კი სიძულვილის პროპაგანდაში. მისი თქმით, ქართულმა ოცნებამ საქართველოს ნანატრი თავისუფლება მოუტანა, მანამდე კი უსამართლობა სუფევდა.

"ჩვენ ვმართავთ ქვეყანას დემოკრატიულად და მართლა ჩვენს მოსახლეობას მოვუტანეთ თავისუფლება, რომელიც იყო ასე ნანატრი 2012 წლის პირველ ოქტომბრამდე. სხვათაშორის, ძალიან დიდი დრო არ გასულა მას შემდეგ, რაც პირველ ოქტომბერს მთელმა ქვეყანამ ისტორიული გამარჯვება მოიპოვა ჩვენი დამფუძნებლის, ბატონი ბიძინა ივანიშვილის ლიდერობით და სამეგრელოში, მე მინდა გავიხსენო, თუ რაოდენ, თუ როგორი უსამართლობა, არა მხოლოდ სამეგრელოში, არამედ მთელს ქვეყანაში, რა თქმა უნდა, უსამართლობა იყო დამკვიდრებული და სუფევდა ყველგან ეს მჩაგვრელი ხელისუფლება. მათი ხელწერა იყო ტერორი, შანტაჟი, ჩაგვრა ჩვენი მოსახლეობის, რაც ჩვენ, ყველამ ერთად დავასრულეთ, მეგობრებო", — განაცხადა ღარიბაშვილმა.

ღარიბაშვილის განცხადებით, ნაციონალური მოძრაობა ვერასდროს დაბრუნდება ხელისუფლებაში, რადგან "ქართველი ხალხი ბრძენია, ხალხმა იცის კეთილის და ბოროტის, შავი და თეთრის გარჩევა".