პარტია საქართველოსთვის პოლიტსაბჭოს წევრის, მიხეილ დაუშვილის განცხადებით, დღის წესრიგში არჩევნების გადადება კი არა, მისი უსაფრთხოდ ჩატარება უნდა იდგეს. დეპუტატის თქმით, თვითმმართველობის არჩევნებამდე საკმაოდ დიდი დროა იმისთვის, რომ მისი უსაფრთხოება უზრუნველყოფა შესაძლებელი იყოს.

"წინ საკმაოდ დიდი პერიოდია დარჩენილი იმისათვის, რომ თუ ამისი ნება არსებობს და ამისი კომპეტენცია არსებობს, [შესაძლებელია] რომ მმართველმა ძალამ დაასტაბილუროს ეს სიტუაცია [...]

დღეს ჩვენი მთავარი ამოცანა ის კი არ უნდა იყოს, რომ ვისაუბროთ არჩევნების გადადებაზე, მთავარი ამოცანა უნდა იყოს უსაფრთხოდ არჩევნების ჩატარებაზე საუბარი. ეს არის ყველაზე მნიშვნელოვანი", — განაცხადა მიხეილ დაუშვილმა TV ეთერში.

დაუშვილი აღნიშნავს, რომ ნებისმიერ შემთხვევაში ადამიანის სიცოცხლე და ჯანმრთელობა ყველაზე მაღალი ღირებულებაა.

"რა საკითხსაც არ უნდა ვეხებოდეთ, იქნება ეს არჩევნების გადადება, თუ ნებისმიერ სხვა საკითხი, თავისთავად ცხადია, ადამიანების სიცოცხლე და ჯანმრთელობა არის ყველაზე მაღალი ღირებულება, ყველაზე მნიშვნელოვანი და აქ, უბრალოდ, კითხვა ვერ იარსებებს", — განაცხადა მიხეილ დაუშვილმა.

დღეს, საკოორდინაციო საბჭოს წევრებმა განაცხადეს, რომ არჩევნების გადადების საკითხზე ჯერ არ უმსჯელიათ, თუმცა ეს არც გამორიცხეს.

"მომავალში რა მსჯელობა იქნება, მაგის შესახებ ნამდვილად ვერ მოგახსენებთ, აღნიშნულ ეტაპზე მსგავსი საკითხი არ განუხილავს", — განაცხადა საბჭოსთან არსებული ოპერაციული შტაბის უფროსმა, გიორგი ღიბრაძემ.

სახალხო დამცველი, ნინო ლომჯარია აცხადებს, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

გაიგე მეტი: